CEBU, Philippines - Nang-apod-apod og hinabang ang kagamhanan sa probinsiya sa Sugbo sa 25 ka mga pamilya nga apektado sa sunog didto sa Don Andres Soriano (DAS), Lutopan, siyudad sa Toledo sa miaging adlaw.
Ang hepe sa Provincial Social Welfare and Development Office (PSWDO) Evelyn Senajon maoy nanguna sa pagpanghatag nga naglakip usab sa tulo ka kilong bugas humay, de lata, kaldero, banig, mosketiro ug uban pang kagamitan sa panimalay.
Si bokal Gigi Sanchez sa tersiro distrito sa Sugbo ug Toledo City vice mayor Antonio Yapha maoy nangulo sa maong kalihokan pagpakita sa ilang kaluoy ug pakigduyog sa kasub-anan sa mga biktima.
Si DAS, Lutopan barangay Captain Jeffrey Cabrera mihangop sa ayuda nga nadawat sa mga apektadong pamilya gikan sa kagamhanan sa Probinsiya sa Sugbo.
Si Kapitan Cabrera mitataw nga sayo niini si Toledo City Mayor Sonny Osmeña mihatag usab og tag P10mil sa matag pamilya nga wala pay labot sa hinabang sa barangay.
Si Bokal Sanchez mipasalig usab sa dugang hinabang sa mga nasunogan sama sa paghatag og mga tambal ingon man pinansyal sa mosunod nga mga adlaw ngadto sa mga hingtungdang pamilya.
Nasayran nga mikabat og 13 ka balay ang naugdaw sa maong sunog diin tulo ka tawo ang naangol. (BANAT NEWS)