Mitambong sa party gidunggab sa liog patay

CEBU, Philippines - Usa ka 50- anyos nga lalaking mitambong sa birthday party sa iyang paryente ang nakakita og away sa laing bisita nga miresulta sa pagdunggab kaniya samtang sila nag-inom diha sa Sitio Cabatuan sa barangay Western Poblacion sa lungsod sa Poro isla sa Camotes.

Ang biktima mao si Norberto Donaire Jr., nagpuyo sa maong lugar samtang ang suspek mao si Ruphel Daitol, 22, nagpuyo sa barangay Cansuelo sa lungsod sa San Francisco isla sa Camotes.

Subay sa spot report nga gipadangat sa Poro Police sa operations branch sa Cebu Police Provincial Office (CPPO) ang suspek ug ang biktima pulos imbitado sa birthday party ni Anecito Donaire.

Apan samtang sila nag-inom nagkatinubagay ang duha ug nagkalalis. Gumikan sa kahubog giingong gidunggab sa suspek ang liog sa biktima  kinsa wala makabantay hinungdan sa pagkalup-og niini.

Dihadiha giyak-an sa suspek ang biktima ug gitiwasan sa pagdunggab ang kalawasan.

Ang biktima gidala sa Ricardo Maningo District Hospital sa lungsod sa San Francisco apan patay na kini pag-abot didto.

Mitahan hinuon dayon ang suspek sa mirespondeng mga polis. (Darrel A. Carumba/EIM)

Napoles padayong gipangita

Padayon karong gipangita si Janet Lim-Napoles kinsa gimandong sikupon sukad pa niadtong adlaw nga Miyerkules tungod sa reklamong "serious illegal detention" sa usa ka whistleblower sa P10-billion pork barrel scandal.

Sumala pa sa report sa GMA News.tv, si Napoles nga usa ka negosyante gimandong sikupon samtang gipaabot pa ang warrant of arrest niini kagahapong adlawa.

Ang abogado ni Napoles nga si Lorna Kapunan miingon nga bisan siya wala siya makakita o makahibalo kung asa karon ang iyang kliyente, gipanawagan niya si Napoles nga mopakita na tungod kay dunay mga legal nga pamaagi aron maklaro ang tanan sa maong isyu.

Niadtong Miyerkules, ang Branch 150 sa RTC-Makati mipagawas og warrant of arrest batok kang Napoles human kini gitumbok nga maoy mipa-kidnap kang Benhur Luy ug igsuon ni Napoles nga si Reynald 'Jojo' Lim.  Sumala pa nga gitun-an karon ni Justice Secretary Leila De Lima ang posibleng pagpasaka og kaso kang Napoles may kalambigitan sa anomalosong pork barrel sa mga magbabalaod. (Gikan sa Wires/EIM) (BANAT NEWS)