CEBU, Philippines - Ang kagamhanan sa dakbayan sa Talisay nagplano sa pagpabalik sa pagpangihaw og baka sa ihawan sa siyudad alang sa dugang kita.
Si Konsehal Danny Caballero, chairman sa committee on market and slaughter house nagkanayon nga kun mahibalik ang maong pagpangihaw dugang abot ang mapaabot sa ihawan.
Si Caballero nagkanayon nga aron makadaginot usab ang siyudad dili na mokuha og laing mga mangingihaw inig balik sa operasyon sa pagpangihaw og baka.
Matud ni Caballero nga ang mga negosyante og karne mao nay mopili sa ilang mga sakop nga maoy permamenteng mangihaw sulod sa ihawan.
Apan ang maong mga mangingihaw ipaubos pa sa training didto mismo sa ihawan aron sila makakat-on sa paggamit sa mga ekipo ug matudloan usab sila sa pagmentinar sa kalimpiyo sa ihawan.
Ang ihawan sa Talisay usa ka double A (AA) standard kansang karne siguradong limpiyo. Ang mga mangingihaw nga ipadala sa negosyante ipaubos usab sa medical examination sa pagsiguro nga wala sila’y sakit nga mananakod.
Gipahunong kaniadto sa siyudad ang operasyon sa pagpangihaw og baka tungod kay giingong lisud na kontrolahon ang mga tawong mosulod ug gawas sa ihawan ug naghatag og peligro sa kalimpiyo sa mga karne nga giihaw.
Ang city veterinarian nga si Dr. Santiago Hortel nagkanayon nga labing maayo unta kung ang mga mangingihaw ubos sa siyudad kay madisiplina nila kini kung dunay kalapasan.
Apan dili usab siya supak sa nahisgutang plano ni Caballero nga ang mga negosyante og karne maoy magpadala og mga mangingihaw nga moihaw sa ilang mga baka.
Matud ni Hortel nga ang mga negosyante og baka mobayad og P300 matag usa ka baka nga ipaihaw sa ihawan.
Sa pagkakaron mga baboy pa ang gipangihaw nga bayran og P200 matag ulo.
Gibutyag ni Hortel nga gikan sa Lunes hangtud sa Biyernes mokabat sa 130 ka mga baboy ang maihaw apan sa Sabado ug Domingo mokabat sa 250 ka mga baboy ang maihaw. (/WC) (BANAT NEWS)