CEBU, Philippines - Napisat ang lawas sa usa ka construction worker human natagakan sa loader bucket sa crane nga nanukad sa ika- 12 nga andana sa gitukod nilang building sa Eagles Nest Condominium sa dalan H. Abellana sa barangay Canduman dakbayan sa Mandaue alas-10 pasado ang takna kagahapon sa buntag.
Si PO3 Nestor Montecillo sa kapolisan sa Presinto 6 sa Mandaue City Police Office (MCPO) nga nahinabi sa Banat News miila sa namatay nga mao si Bernardo Belbao, 40, taga La Guardia, barangay Lahug, dakbayan sa Sugbo ug team leader sa mga trabahante sa Primary Structures nga nagtukod sa maong edipisyo.
Matud pa ni Montecillo nga nag-supervise ang biktima sa pagkarga sa mga pre-fabricated walls nianang tungora dihang nabugto ang kable sa crane nga gibitayan sa maong mga kongkretong bungbong.
Si SPO3 Marcos Noval sa Investigation and Detection Bureau sa MCPO nga nahinabi sa Banat News miingon nga duna say laing trabahante nga nadagit usab sa paglabyog sa saddle beam sa crane. Si George Briones Estolon nga taga barangay Pitogo sa lungsod sa Consolacion ang nakasinati usab og kadaut sa iyang kalawasan ug nalandig kini sa tambalanan.
Matud pang Noval nakabantay ang ubang mga trabahante sa pagkabugto sa kable apan ang biktima wala na makakita pa kung unsay nakaigo kaniya tungod pagkapisat sa lawas niini.
Gisusi pa karon kung dunay tulubagon ang crane operator nga si Fotunato Aranias Pagatpat, 30, sa nahitabo. (/EIM) (BANAT NEWS)