CEBU, Philippines - Nailogan sa armas ang suspetsadong tulisan sa dihang gilayog kini sa drayber sa taxi nga gisuwayan niya og tulis didto sa dalan M.L. Quezon sa barangay Casuntingan sa dakbayan sa Mandaue kagahapon sa alas 2:00 sa kaadlawon.
Gumikan kay wala nay armas, sayon kaayong nasikop sa kapolisan si Arturo Escoton Banzon, 18, ulitawo nga taga dakbayan sa Mandaue.
Ang biktima mao si Jonas Baguio Nunez, 47, minyo nga drayber sa taxi, nga taga barangay Polipog, sa lungsod sa Cordova.
Si PO1 Dennis Estrada sa kapolisan sa Presinto 4 sa Mandaue City Police Office (MCPO) nga nagbase sa barangay Casuntingan nga nahinabi sa Banat News miingon nga gikan sa highway sa maong dakbayan ang taxi diin misakay ang suspetsado.
Didto molingkod sa front seat tapad sa drayber ang suspek.
Dihang kalit lamang kining milanit sa iyang armas de fuego samtang nagdagan subay sa dalan M.L. Quezon sa barangay Casuntingan ang taxi. Dayon gitionan niini ang drayber ug mideklarar nga tulis.
Matud pa ni PO1 Estrada nga dihang gipangayo sa maong tulisan ang kinitaang salapi sa drayber, gitapi niini ang sumbohan sa armas dayon gilayog niini ang tulisan.
Nailog sa drayber ang .45 kalibre nga pistola sa tulisan kansang magazine puno sa mga bala. May mga molupyo sa maong dapit nga nakamatikod sa maong hitabo kinsa maoy nakapanawag dayon sa buhatan sa kapolisan.
Tungod kay wala na makagawas sa taxi, didto kini sikopa sa kapolisan sulod sa sakyanan nga gimaneho sa biktima.
Ang maong dinakpan nabalhog karon sa prisohan sa sa Casuntingan Police Station samtang gihikay na ang tukmang kiha nga ipasaka batok kaniya. (BANAT NEWS)