CEBU, Philippines - Makadawat na gyud sa ilang sweldo ang 238 ka kaswal nga mga kawani sa buhatan sa bise mayor sa dakbayan sa Danao nga wala bayari sa miaging administrasyon.
Kini human nakabutang na og piyansa ang mga kawani sa gimando sa korte balor og P450 mil sa pagpangayo og temporary restraining order sa kamandoan ni kanhi mayor Ramon “Boy†Durano Jr. Ang Regional Trial Court sa dakbayan sa Danao miluwat na og writ of preliminary injunction human giaprobahan ni Judge Jerry Dicdican ang piyansa sa mga kawani nga ningkiha sa kanhi mayor ug kaubanan.
Sa kamandoan nga gipetsahan og Hulyo 29, 2013, ug gilagdaan ni clerk of court Isidro Bongcayao Jr., sila si Durano, Budget Officer Teresita Almacen ug Galacito Camaongay, ang officer-in-charge sa City Human Resource Management Office, gimandoan sa dili pagpatuman sa memorandum nga gipetsahan og Hulyo 9, 2012 nga nagpahunong sa pagpasweldo sa 238 ka mga kawani sa buwan sa Hunyo hangtud Septiyembre 2012.Sa resolusyon niadtong Hunyo 25, 2013, gihatag ni Dicdican ang gipangayong writ of preliminary injunction apan mobutang una og P450 mil ang mga kawani hangtud mahingpit ang hukom sa korte.
Niadtong Hunyo 26, 2013 nibutang og surety bond ang mga kawani dugang sa nahaunang P50 mil sa pagluwat sa TRO.
Si RTC Judge Sylvia Aguirre-Pederanga ang niluwat sa TRO apan wala tumana ni kanhi mayor Durano.Wala na si Durano sa pwesto human siya pildeha sa igsoon nga si Mayor Ramon “Nito†Durano III kinsa maoy bise-mayor niadtong higayuna nga wala sweldohi ang mga kawani. (/EIM) (BANAT NEWS)