CEBU, Philippines - Kritikal ang kahimtang sa 27anyos nga mag-uuma human kini dunggaba sa iyang kontra didto sa barangay Campangga sa lungsod sa Barili niadtong Huwebes sa alas 9:30 sa gabii.
Ang biktima mao si Jomar Lopez Marata, 27, ulitawo ug mag-uuma nga nagpuyo sa maong lugar.
Samtang ang suspek mao si Larry Porlasen, hingkod, ulitawo apan dunay kapuyo nga taga barangay Gunting, Barili.
Si PO1 Ronnie Guzman sa Barili Police Station mibutyag nga ang biktima naglakaw paingon sa ilang balay apan sa pag-abot niini sa ngitngit nga bahin sa maong dapit kalit kini nga gidunggab sa suspek.
Duha ka samad ang agi sa mitaop nga kutsilyo sa buko-buko sa biktima.
Ang suspek dali nga miikyas pahilayo ug ang biktima daling gitabang sa mga estambay nga nahiagi sa maong lugar ug gihatod sa Barili District Hospital sa lungsod .
Hinuon gi-transfer dayon kini sa tambalanan sa dakbayan sa Sugbo.
Ang kapolisan sa lungsod wala pa makatumbok sa motibo sa krimin sanglit wala pa man hidakpi ang suspek.
Wala pa usab sila makakuha og pamahayag sa biktima bahin sa tinuod nga hinungdan sa maong pagluba kaniya
Padayon pa nilang gipangita ang suspek. WC (BANAT NEWS)