Asawa sa gipatay sa amahan mokiha

CEBU, Philippines - Mopasaka  og kaso ang asawa sa 36 anyos nga construction worker nga gitabangan og patay sa iyang amahan, bayaw ug uyoan didto sa Sitio Muhon, barangay Tutay ,sa lungsod sa Pinamungajan  sa miaging Lunes sa gabii.

Si Yolinda Manguilimutan, 30,  nakig-alayon na sa kapolisan alang sa pagpasaka og kaso batok sa mga suspek nga si Eulalio Manguilimutan, 70, ang amahan, bayaw nga si France Meretonro ug uyoan nga si Poling Cabaluna.

Si PO1 Ronilo Lawas sa Pinamungajan Police Station  mibutyag  sa Banat News  nga si Yolinda mitug-an nga didto siya sa sulod sa balay nagkugos sa ilang kamanghoran nga anak nga kapin usa ka tuig  ang  edad, dihang gibato sila sa mga suspek .

Human  og  bato, misulod ang  maong  mga  suspek  ug gitabangan og dunggab ug tigbas ang   iyang  bana  nga  si Jerby Manguilimutan, 36.

Sa imbistigasyon ni PO2 Marciano Suarez, imbestigador sa Pinamungajan Police Station  gitug-an sa 12 anyos nga kamaguwangang anak lalaki sa biktima,  nga nakakita gyud siya   dihang  gitabangan  og   dunggab sa iyang amahan sa mga suspek.

Ang  mga  suspek   iya  ra  usab nga apohan, bayaw ug uyoan.

Gani gitug-an   usab ni Yolinda nga dihang nagkagubot   midagan siya paingon sa gawas kay nahadlok nga apilon  sa pagpatay.

Si PO1 Lawas   mikompleto pa karon   sa  mga  affidavit sa asawa ug anak niining saksi sa hitabo alang sa pagpasaka og kasong parricide batok sa amahan nga  suspek, ug  murder   para  sa bayaw ug uyoan nga suspek.

Ang suspek nga  si  Eulalio, 70,  nagtingkagol na karon sa karsel human madakpi sa hot pursuit operation sa kapolisan.

Samtang pabilin  pa nga  gawasnon ang laing duha ka suspek nga si France Aro ug Poling Cabaluna. (/WC) (BANAT NEWS)