CEBU, Philippines - Nadakpan sa kapolisan ang usa ka computer technician nga giingong front ra diay ang negosyo sa computers human kini nila madakpi sa usa ka buybust operation diha sa iyang balay sa sitio Mahayahay, sa barangay Bankal sa dakbayan sa Lapulapu kaganihang kaadlawon.
Ang nadakpan mao si Rocky Abing, 53, naila sa ilang mga silingan nga mo-assemble og computers.
Nakugang na lang ang mga silingan nga dili diay mga computers ang negosyo sa suspek human kini nadakpan sa grupo ni Senior Inspector Rogelio Pineda, hepe sa City Anti Illegal Drug Special Operation Task Force (CAIDSOTF).
Sa pagsiksik sa mga sakop sa CAIDSOTF sa panimalay ni Abing nadiskubrehan gikan sa lawting sa balay niini ang duha ka bulto ug 72 ka paketeng may sulod nga gidudahang shabu.
Si Pineda miingon nga makabaligya og kapin 30 gramos nga shabu si Abing.
Si PO3 Joseph Villamor maoy gihimong poseur buyer sa maong operasyon nga miresulta sa pagkasikop ni Abing.
Si Barangay Konsehal Mario Aying sa barangay Bankal nga maoy nahimong saksi sa maong operasyon miingon nga bag-ohay lang nabalhin sa ilang barangay si Abing human kini nakapalit og luna sa ilang dapit.( /EIM) (BANAT NEWS)