CEBU, Philippines - Wala pa makahuman ang kapolisan sa Badian sa pag-imbestigar sa kontrobersya sa kamatayon sa bag-ong natawo nga bata nga natagak sa traysikad ug namatay human balibari sa birthing center sa maong lungsod sa niaging semana.
Si Insp. Edar Labe, hepe sa Badian Police Station nga anaa na sa 90 porsiyento ang dagan sa ilang imbistigasyon nga gidumala sa ilang women’s desk nga si PO3 Josefina Beriarmente.
Apan wala makuhai og pamahayag sa nagpadayon nga imbistigasyon si PO3 Beriarmente ning tigbalita kay wala kini sa iyang buhatan dihang gitawagan kini kagahapon sa buntag ug udto.
Apan gitataw ni Insp. Labe nga hapit na nila ma establisar kun si kinsa ang adunay criminal liability sa maong hitabo.
Hinuon gitataw ni Insp. Labe nga kun makompleto na ang ilang imbistigasyon, iduso dayon nila kini ngadto kang Sr/ Supt. Patrocenio Comendador, hepe sa Cebu Police Provincial Office (CPPO).
Si Comendador maoy nimando sa kapolisan sa Badian sa pagpahigayon og buwag nga imbistigasyon sa maong kontrobersiya.
Una nang gireklamo sa magtiayon nga si Regina Javierto ug Benjamen Javierto nga gibalibaran sila sa midwife ug staff nga sila si Ma. Beatrez Vasquez ug Luzviminda Bruce sa birthing center.
Giabog sila niini ug gipasakay sa usa ka traysikad diin nanganak ang inahan ug ang anak niini natagak sa karsada ug namatay. (BANAT NEWS)