CEBU, Philippines - Walo ka mga babaye, usa niini kumpirmadong menor de edad, ang gi-rescue sa kapulisan samtang nadakpan usab ang giingong trafficker atol sa gipahigayong entrapment operation sa lungsod sa Moalboal kagahapon sa buntag. Ang hepe sa Regional Anti-Human Trafficking Task Force (RAHTFF) 7 nga si Senior Insp. Ma. Theresa Macatangay miila sa suspek nga si Jenvie Cabaluna, 29.
Matud pang Macatangay, usa ka concerned citizen ang mipahibawo kanila duha ka semana na ang nakalabay bahin sa ingong pagbugaw sa suspek sa mga biktima ug apil niini ang usa ka 17-anyos ug usa ka amang.
Gipailawom ang suspek sa duha ka semanang surveillance ug dihang nakompirmar ang report gisubay sa kapolisan kun taga asa ang mga biktima ug ilang nasayran nga sila taga syudad sa Danao, lungsod sa Liloan, Alcantara, ug Barangay Panagsama, Moalboal.
Tungod niini, usa ka entrapment operation ang gilusad batok sa suspek diin usa ka polis ang nagpakaaron-ingnong ‘mangabang’ og babaye diha sa usa ka resort sa Barangay Poblacion, Moalboal. Dihang gidala sa suspek ang mga babaye aron kapilian ug gidawat niini ang kwarta diha na kini gidakop.
Mga langyaw nga guest sa mga resort sa Moalboal maoy giingong mga parokyano sa suspek. “She’s alone in her operation but cover niya ang whole Cebu and even Bohol,†matud pang Macatangay. Iyang gihulagway ang suspek nga usa na ka-established nga bugaw kay igo na lang kini mo-text sa iyang mga langyaw nga kustomer. Ang suspek, sa dihang gikuhaan sa iyang habig hugtanong mihimakak sa pasangil ug mirason nga mga amiga niya ang mga biktima nga iyang nailaila sa Moalboal.
“Bahala na ang Ginoo sa mga tawo na nagtudlo nako nga bugaw ko,†matud pa sa suspek. Kasong kalapasan sa Expanded Anti-Human Trafficking in Persons Act ang gikatakdang ipasaka batok sa suspek karong adlawa. (BANAT NEWS)