CEBU, Philippines - Usa ka Sugbuanon ang miuli og dakong kantidad sa salapi nga gipanag-iya sa usa ka Norwegian national nga iyang nakit-an sa usa ka rest room sa usa ka mall sa Mandaue City.
Si Noel Jonathan Quinain, 28-anyos, nga taga-Labogon, Mandaue City niuli sa salapi nga nagkantidad og Php 48,750 ngadto sa Norwegian national nga si James Alen Norwich, nga gisulod sa usa ka sealed brown envelope.
Ang nahisgutang butang nga adunay salapi nahabilin ni Norwich didto sa restroom sa Pacific Mall niadtong Hulyo 9.
Nauli ang maong salapi niadtong Hulyo 10, sa wala pa makalarga si Norwich pabalik sa Norway.
Saysay pa ni Quinain, nga ni-file siya og two-days leave sukad pa’g Hulyo 8-9 ug pagka Hulyo 9, nakadesider siya nga humanon ang iyang gihikay nga passport sa Department of Foreign Affairs ug niadto siya sa Pacific Mall diin nahimutang ang maong buhatan, sayo sa kaadlawon.
Matud pa niya gisultihan siya sa DFA personnel nga pabalikon pagkaalas 11 sa buntag alang sa iyang appointment apan naabtan siya og ala-una sa hapon wala pa gihapon siya ma-interbyu.
Tungod niini misulod siya sa pansayan ug didto iyang nakit-an ang usa ka sealed brown envelope ug uban pang kahimanan nga gipanag-iya ni Norwich.
“When I saw inside the restroom a sealed brown envelope containing cash amounting to Php 48,750.00 and other valuable documents owned by Mr. James Alen Norwich, I was scared and confused on what to do next,†matud pa ni Quinain.
Busa iya dayong giduol ang guard-on-duty para magpatabang apan gibalewala ra siya sa guard ug nagpadayon ra kini og panawag sa mga aplikante.
Sumala pa ni Quinain nagsige na lang siya og saka kanaug sa mga floors sa Pacific Mall sa pamasin nga iyang mamay-ongan si Norwich, apan napakyas siya mao nga iyang gitawagan ang cellphone number nga nabutang sa mga dokumento sa envelop apan di kini makontak.
Tungod sa kahadlok nga patyon usab siya sa mga guard sa parehas sa nahitabo sa usa ka naalaang kawatan sa usa ka sikat nga department store sa dalan Colon niadtong buwan sa Abril, nakadesider siya nga hiposon ang kwarta inay mapunta kini sa mga kiriwan og kamot.
Pagkasunod adlaw, Hulyo 10, gitawgan niya og balik ang cellphone number ni Norwich ug swerteng nagkaestoryahay silang duha.
Nagsabot sila nga magkita sa fourth floor sa DFA sa mao gihapong mall aron mauli niya ang kwarta ug mga butang ni Norwich. Dihang nagkita na sila, wala dayon niya gihatag ang maong kwarta kay iya unang gi-verify kung mao ba gyud kini si Norwich ug human makompirmar nga mao kini ang tag-iya giuli ni Quinain ang maong mga butang.
Human niini, nag-uban silang duha sa Mandaue City Police Station One ug didto iyang gisaysay kang PO2 David Umambac ang nahitabo.
Wala siya magmahay bisan og gimarkahan siya sa iyang supervisor nga absent sa iyang trabaho tungod kay alang kaniya dako ang iyang nabuhat nga kaayohan ngadto sa uban sa maong adlaw. (BANAT NEWS)