CEBU, Philippines - Duha ka sunog ang miigo sa duha ka dakbayan sa managlahi nga oras ug lugar niadtong Biyernes sa gabii ug kagahapon sa kaadlawon.
Naputol ang hinanok nga pagkatulog sa pamilyang Rodriguez dihang miulbo ang dakong sunog sa taas nga bahin sa dos andanas nilang panimay diha sa sitio San Lorenzo, barangay Subangdaku sa dakbayan sa Mandaue.
Pasado alas-4 sa kaadlawon nadawat ang alarma sa mga sakop sa kabomberohan sa Mandaue. Nakontrolar kini sulod lang sa 20-minutos.
Si Mandaue Fire Marshall Chief Insp. Ronaldo Orbita mipadayag nga iyang giisa ngadto sa Task Force Alpha ang maong sunog kini aron daling matabang tungod kay nagsikit ang mga panimalay sa maong dapit. Gani, usa sa ilang problema mao ang kahuot sa dalan hinungdan nga gikinahanglan pa nga sumpay-sumpayon ang hose aron makaabot sa tulo ka panimalay nga nasunog.
Gibanabanang mokabat sa P300 mil ang danyos sa maong sunog diin duha ka panimalay ang hingpit nga naugdaw samtang usa niini ang diriyot usab mahurot sa kalayo.
Ang tag-iya sa maong panimalay nga si Anita Rodriguez, mipadayag usab nga una nilang nabantayan mao ang kalit nga pagpalong sa suga diin nagtuo sila nga nag-brownout.
Apan sunod na lang nga natimahoan ni Anita mao ang baho na sa sunog nga kuryente ug susama sa iyang nabatyagan nga miinit ang ilang dapit hinungdan nga iya kini nga gisusi. Hilabihan nga kakurat ni Anita dihang pagsusi niini magkalayo na ang ilang taas hinungdan nga dali usab sila nakapahibalo sa ilang kasilinganan.
Samtang pasado alas- 7 sa Biyernes sa gabii naugdaw ang 'We Do Recover' nga usa ka pribadong drug rehabilitation center diha sa 3rd St. sa La Guardia, Lahug sa dakbayan sa Sugbo.
Matod pa sa gwardiyang si Eddie Algora, nga kalit lang adunay nanimahong sunog nga plastic hinungdan nga ilang gisusi apan sa ilang pagsaka sa taas ilang nasuta nga usa sa mga lawak sa maong rehabilitation center nasunog.
Tuod man, ilang gigamitan og fire extinguisher apan giingong nahurot na lang kini wala gihapon mapalong ang kalayo hinungdan nga dali silang nakatawag og bombero.
Samtang ang ilang mga pasyente usab dali usab nilang gipagawas.
Ang deputy chief for operation sa Cebu City Fire Office SFO4 Jovito Abelgas mipadayag usab nga ilang giisa ngadto sa 2nd alarm ang maong sunog ug giingong ilang nakontrolar ang maong sunog sulod lang sa 10 minutos. Gibanabanang mokabat sa P200 mil ang danyos sa maong sunog.
Samtang nasayran usab sa kabomberohan nga kaduha na diay nakahimamat og problema sa kuryenti ang maong establisemento.
Si Barangay Apas, Barangay Captain Ramil Ayuman kinsa usa sa miresponde sa lugar uban sa iyang barangay fire volunteers nagpasalamat sa usa ka kompanya diha sa maong dapit nga mipagamit sa ilang dagkong hose nga maoy daling naka-penetrate sa nasunogan maong wala kini makatapon sa kasikbit nga mga balay.
Ang duha ka nahitabong sunog gituohang nagsugod tungod sa faulty electrical wirings. (BANAT NEWS)