Gidaghanon sa nagparehistro nikunhod
CEBU, Philippines - Dili na kaayo daghan ang mga tawo nga nagpunsisok sa opisina sa Commission on Elections (Comelec) aron magparehistro alang sa nagsingabot nga eleksyon sa mga opisyal sa barangay ug Sanguniang Kabataan.
Matud ni Cebu City north district Election Officer Marchel Sarno nga matag adlaw makarehistro sila og kapin sa usa ka libo, ang mga 500 niini mga batan-on nga magparehistro sa SK ug ang laing 700 ngadto sa 800 mga hamtong na og pangidaron. Kaniadtong Lunes sa pagsugod sa napulo ka adlaw nga pagpangrehistro nagdasok ang mga tawo nga nag-ambahan sa Comelec ug nag-ilogay kinsa kanila ang makauna.
Matud ni Sarno nga dugay sila nga nahatagan sa ilang gipangayo nga puthaw nga koral nga mopugong sa mga tawo nga dili makadasmag ngadto sa pultahan sa Comelec.
Tungod sa pagsigi’g tinukmoray sa mga tawo nabuak ang bildo nga bung-bong sa opisina sa Comelec.
Kagahapon hapsay na kay gawas nga dili na kaayo daghan ang mga tawo aduna nay puthaw nga railings nga gipahimutang nga magpugong sa paghasmag ngadto sa opisina sa Comelec.
Si Sarno nagkanayon nga gawas sa mga SK, ang iyang opisina nakarehestro og 789 nga mga bag-ong botante ug mga transferees kaniadtong Lunes, ug 805 pagka Martes. (BANAT NEWS)
- Latest
