CEBU, Philippines - Nakakuha na ang National Bureau of Investigation (NBI) – 7 ug mga record gikan sa Tuburan District Hospital diin usa ka 3 anyos nga bata ang wala atimana niadtong Hulyo 7. Nakakuha na og mga pamahayag ang National Bureau of Investigation kabahin sa reklamo sa usa ka pamilya batok niadtong mga doktor sa Tuburan District Hospital nga ilang gipasanginlang nagpabaya maong namatay ang ilang 3-anyos nga anak.
Ang NBI padayong naghimo og imbestigasyon sa posibleng tulobagon nila ni Dr. Jatuporn Vatangul ug sa nursing aide nga si Chito Jaluag kinsa giingong wala moatiman sa bata nga si Chris John Lidres.
Ang pamilyang Lidres nakahatag na og pamahayag bahin sa hitabo.
Matud ni NBI – 7 Regional Director Atty. Antonio Pagatpat, ang mga makuha nilang pamahayag gamiton isip primary evidence sa criminal liability ni Dr. Vatangul.
Sumala pa nga kun makakuha na og dugang ebidensya ang NBI ilang ipatawag si Dr. Vatangul ug si Jaluag. “After evaluating all these evidences, doon pa tayo makapag-decide kung may subpoena sila,†dugang pa ni Pagatpat.
Ang biktima nga si Lidres gidala sa maong hospital pasado alas dose sa udto dihang hapit kini malumos sa dagat sa Sitio Timbacol, Barangay Putat, Tuburan. Giatiman siya ni Vatangul ug pagkahuman gipapahuway sa Emergency Room kauban si Jaluag.
Matud pa nga makasulti ug makalihok pa ang bata dihang gisusi sa doktor apan pipila ka oras ang milabay namatay kini.
Sumala pa nga gipamalihogan pa nila si Jaluag nga tawagon ang doktor apan natulog kuno kini ug alas 3:30 pa kini momata maong ilaha gyud kining gipaabot bisan nagtinga na ang bata. (BANAT NEWS)