Oplan Sita pakusgan sa kapolisan sa Talisay

CEBU, Philippines - Ang kapolisan sa dakbayan sa Talisay mosubsob sa ilang pagpahigayon og saturation drive ug Oplan Sita sa mga mag-inom   sa daplin sa kadalanan ilabi na sa lawom nang gabii.

Si Superintendent Resty Santos, officer-in-charge sa Talisay City Police Station nagkanayon nga sa milabay’ng duha ka semana nabantayan niya nga unom ka insidente sa pagpanunggab ang nahitabo  sa nagkalainlaing  mga lugar sa siyudad hinungdan nga pahugtan nila ang Oplan Sita.

Kining  maong  kampanya gitumong   ilabi na sa mga mag-inom  daplin sa karsada sa lawom nang gabii.

Matud ni Santos nga nabantayan usab niya nga usa sa hinungdan sa pagpanunggab mao ang panaglalis kun  mangahubog na.

 Gawas niini magpahigayon usab sila og saturation drive sa tanang ilegal nga kalihukan sama sa sugal  ug illegal  nga  drugas.

Adunay mga krimen    nga sugal maoy usa sa sinugdanan diin ang mga tawo nga sugarol magkalalis  ug mosangpot na  sa pinatyanay.

Gawas sa ilegal nga sugal ang kapolisan mopahigayon usab og saturation drive batok sa gidiling drugas  sa barangay Tanke.

Apan matud ni Santos nga sa pagkakaron negatibo pa ang resulta sa ilang saturation drive batok sa ilegal nga drugas.

Gitakda niya nga mopahigayon sila og laing saturation drive  sa laing barangay sa Talisay  nga adunay mga kalihukan bahin sa ilegal nga drugas.

Si Santos midugang nga gawas sa mga saturation drive padayon usab ang ilang  check point sa kadalanan aron ang mga tulisan ilabi na kadtong magsakay og mga motorsiklo dili  makapamiktima. (BANAT NEWS)