CEBU, Philippines - Gitukod sa kagamhanan sa dakbayan sa Talisay ang grupo nga mosuroy sa kabarangayan aron pag-edukar sa mga molupyo sa tukmang paglabay sa ilang basura.
Si Edwin Nierves, hepe sa Ecological Solid Waste Management Collection and Transport nga nahinabi sa Banat News mibutyag nga adunay mga residente nga dili magtimaan kung unsang adlawa ang schedule sa pagkuha sa basura sa ilang lugar.
Ang maong mga residente bisan og dili schedule sa pagkuha sa mga basura mobutang sa ilang mga basura diha sa daplin sa karsada.
Dayon huongon sa mga iro ug magkatag sa karsada busa hugaw kaayo ang palibot.
Matud ni Nierves nga base sa ilang monitoring adunay mga residente nga mosuhol og mga bata sa paglabay sa ilang mga basura.
Unya ang ilang suholan magpataka og labay sa basura ug gani kung walay makakita adto pa kini ilabay sa sapa.
Gibutyag ni Nierves nga nagtukod sila karon og information education campaign committee nga gipangulohan ni Roberto Camay.
Matud usab ni Nierves nga tumong usab nila nga ma-implementar ang waste reduction sa siyudad ilabi na sa mga plastik nga basura tungod kay mao kini ang makabara sa mga kanal nga hinungdan sa baha.
Gibana-bana nga mokabat sa 40 ka toneladang basura ang makolekta matag adlaw ug 40 porsyento niini mga plastik.
Si Nierves nagkanayon nga 30 porsyento nga gidaghanon sa mga basura nga makolekta matag adlaw naggikan sa barangay Tabunok nga sentro sa mga patigayon. Sa laing bahin, si Camay nga nahinabi sa Banat News mibutyag nga niadtong Hulyo 8, 2013 nagsugod na sila sa ilang information drive.
Gibutyag ni Camay nga ang Tabunok, Lagtang ug Tapul maoy una pa nilang gibisita.
Apan ang labing nakita niyang dunay dakung problema mao ang Tabunok diin ubang mga vendors, drayber sa traysikol, habal-habal ug gani ang mga pasahero sa PUJ nga moagi sa maong lugar magpataka lang og itsa sa ilang mga basura.
Matud ni Camay nga mipasidaan na sila ngadto sa mga barangay nga ilang nabisita nga makamulta kini og P1,000 kung masakpan sa sunod nga magpataka og labay sa basura.
Si Camay midugang nga ang siyudad aduna nay ordinansa nga nagtakda og silot sa magpatuyang paglabay sa ilang basura. (/WC) (BANAT NEWS)