Usa ang patay, 3 brgy gilunopan

CEBU, Philippines - Usa ang patay samtang tulo ka barangay sa Danao City ug pipila ka lugar sa lungsod sa Consolacion ang gibahaan tungod niining pagbira sa Tropical Depression Isang sa hanging habagat nga nakaapektar sa lalawigan sa Sugbu.

Mikaging na ug wala nay kinabuhi dihang napalgan sa  Butuanon River ang usa ka construction worker human kini gi-anod sa kusog nga sulog sa baha niadtong Lunes sa hapon pasado alas-5 diha sa barangay Pit-os  sa Cebu City.

Ang biktima nailhan nga si Norman Morcilla, 21, taga Negros Oriental ug kasamtangang nagtrabaho sa usa ka gihimong balay sa maong dapit nga tabok sa sapa.

Ang kauban sa biktima nga si Noli Perolina padung sila mamalik sa ilang bunkhouse niadtong Lunes sa hapon tungod kay gigutom na sila ug mikusog na ang pagbunok sa ulan ug bisan mikusog ang agas sa sapa mipugos sila sa paglabang.

Sumala pa ni Perolina silang tulo uban sa laing kauban nga si Tirso nangaanod apan nasangit sila sa kawayanan ug nakakupot niini, samtang balonan na lang ni Morcilla ang milutaw ug wala na nila kini makita dihang mitidlom sa tubig baha.

"Hapit gani ko madala sa sug, pero kaning di ta kahibalo molangoy maninguha gyud ta," padayag pa ni Perolina.

Milanat og dul-an 12 ka oras ang pagpangita sa mga sakop sa Bureau of Fire Protection, City Disaster Risk Reduction Council  ug pasado alas -dos sa kaadlawon kini napalgan apan patay na.

Samtang kapin 30 kap amilya gikan sa tulo ka mga barangay sa siyudad sa Danao ang nalunopan sa miaging gabii.

Ang mga apektadong barangay sa nasinati nga baha mao ang Poblacion, sitio Ylaya Sandayong ug barangay Tuburan Sur.

Matud pa ni Neil Sanchez, pangulo sa Provincial Disaster Risk Reduction Management Council taga-dughan ang gilawmon sa baha nga miigo sa pipila ka bahin sa maong mga barangay.

Kini maoy hinungdan nga dunay mga pamilyang gipabakwit apan namalik ra human molurang ang tubig baha gikan sa bukid.

Nagusbat usab ang bungbong sa usa ka balay nga gipanag-iya ni Roselle Donozo human madasmagan sa bul-og sa tubig. Gani nagpasad ang mga dagkong bato diha sa kadalanan sa maong mga barangay ug nakahasol sa mga motorista.

Bisan ang basketball court sa Sandayong natabunan usab og mga bato nga gianod gikan sa bukid. Sumala pa nga ang nagrabehang lugar mao ang barangay Poblacion diin dunay napu ka pamilya ang gipugos pagpabakwit human nisud na sa pinuy-anan ang tubig.

Kagahapong adlawa ang PAG-ASA nipaubos sa public storm signal number one sa napulo ka mga lugar sa Northern Luzon tungod sa tropical storm Isang. (BANAT NEWS)