CEBU, Philippines - Banhawon pagbalik sa City Traffic Operations Management (CITOM) ang kampanya pagpangguroy sa mga sakyanan nga ipataka lang pagparking daplin sa karsada, ilabi na panahon sa gabii.
Matud ni CITOM Executive Officer Rafael Christopher Yap nga mohangyo siya ni Mayor Michael Rama nga palitan sila og dugang duha ka tow vehicles aron ilang magamit.
Supak hinoon si Yap nga ang dakbayan mosulod og kontrata sa mga pribadong kompaniya nga maoy moguroy sa mga sakyanan nga masakpan nga magpataka og parking daplin sa karsada.
Kaniadto dunay pribadong kompanya nga gibayran ang siyudad aron maoy mopatuman sa City Ordinance 2172 Towing Ordinance.
Si Yap miingon nga makigtambayayong sila sa mga opisyal sa kabarangayan aron maoy motudlo kanila asa nga dapit sa ilang barangay ang unahon sa paghimo’g operation.
Gipasabot ni Yap nga angayan kini nga himoon aron pagprotiher sa mga lumulopyo nga dili sila mabutang sa katalagman kun may sunog nga mahitabo.
Mga bombero mireklamo nga ang pagpataka og parking sa mga sakyanan diha sa mga access roads sa kabarangayan maoy makabalda kanila sa pag-abot pagdali sa nasunogan.
Ang mga taksi ug PUJ dili mahatagan og prangkisa sa Land Transportation Franchising and Regulatory Board (LTFRB) kun wala sila’y garahe apan daghan ang nakalusot sa lagda.
Ang mga tag-iya sa taksi ug PUJ mopakita lang og hulagway sa ila kuno nga garahe sa sakyanan apan ang tinuod anaa ra sa karsada iparking panahon sa gabii. (BANAT NEWS)