“Manglungkabay” gigukod ug gipatay diha sa dalan Colon

CEBU, Philippines - Patay ang usa ka gidudahang manglungkabay og mga tindahan sa barangay Pasil, sa dakbayan sa Sugbo human kini gigukod sa duha ka mga lalaking nagmotor pasado alas-3 kagahapon sa kaadlawon diha sa dalan Colon sa barangay Pahina Central.

Ang biktima naila lang sa pangalang ‘Negro’ nga gibana-banang 40-anyos  ang pangidaron. Aduna kini tattoo sa likod nga ‘Osoy Ramirez.’

Sa pasiunang imbestigasyon sa kapolisan sa Homicide Section, mipadayag kini nga ang biktima gikatahong gigukod sa wala mailhing mamumuno sakay sa motorsiklo.

Dihang naabtan ang biktima, gipaulanan kini og bala sa mga mamumuno diha sa walang dughan, patay na kini pag-abot sa Cebu City Medical Center.

Narekober sa kapolisan ang mga screw driver, long nose ug yabe de tubo gikan sa biktima. Gidudahang mao kini iyang gamiton sa pagpanglungkab.

Si SPO4 Alex Dacua ang imbestigador sa maong kaso mosusi pa sa motibo sa maong pagpatay ug subayonon pa ang background sa biktima.  (BANAT NEWS)