Masuso gigulgol apan swerteng habolan ang kutsilyo naluwas

CEBU, Philippines - Usa ka napulo pa ka buwang masuso ang gigulgol sa usa ka gipasanginlang adik-adik  diha sa barangay  Baring, isla sa Olango, dakbayan sa Lapulapu alas 6 pasado ang takna sa miaging gabii.

Ang suspek nga nadakpan sa kapolisan ug gipasakaan na og kasong frustrated homicide kagahapon sa hapon mao si Johnny Alindajao, 33, nagpuyo sa maong dapit.

Matud pa ni PO1 Arnel Ortizuela, usa ka Ritchelle Traso, inahan sa bata didto sa silong dihang kalit lang nga misaka sa ilang panimalay ang maong suspetsado maong iyaha kining gisunod.

Nalisang siya sa gibuhat sa suspek kay gigulgol sa suspek ang iyang anak sa gidala niining guna hinungdan nga nakasinggit siya pagpangayo og tabang sa mga silingan.

Matud ni Ortizuela miingon nga habolan ang gidalang guna sa maong suspetsado ug wala makadulot sa liog sa masuso.

Ang suspek nadakpan ra dayon sa kapolisan ug sa mga tawo ug sa pagrekisa nakuhaan kini sa bulsa og usa ka pakete nga gidudahang shabu ug duha ka tinfoils. (BANAT NEWS)