CEBU, Philippines - Usa ka magtutudlo sa grade one didto sa lungsod sa San Remegio ang gipasakaan og reklamo sa buhatan sa Ombudsman Visayas tungod sa pagpamun-og sa usa sa iyang tinun-an nga nakaingon nga ang bata na-traumatized na ug di na mosulod sa klase tungod sa kahadlok.
Ang gipasakaan og reklamo sa Ombusman Visayas nagtudlo sa San Remegio Central School.
Ang 8-anyos nga bata gi-ubanan sa mga apohan nga sila si Danilo Tuico,54, ug asawa nga si Teresita Tuico, 45, sa pagduso sa ilang reklamo niadtong Hulyo 2 ning tuiga. Matud pa nga gilunit sa maong maestra ang biktima niadtong Hunyo 11 tungod sa pagsige niini og suroy-suroy sa sud sa klase.
Apan ang paglunit sa dughan sa bata nakasamad sa dughan niini hinungdan nga gipatan-aw kini sa doktor.
Subay sa gi-isyu nga medical certificate ni Dr. Orleta Ursal, medico legal officer sa San Remegio moabot og 3-centimeter ang samad sa dughan sa bata.
Ang apohan sa biktima midugang sa reklamo nga dili lang kadto ang unang higayon nga gibuhat sa maong magtutudlo sa apo ang pagpanakit. Matud pa niini niadtong Hunyo 5, misumbong ang bata nga gilunit sa maong titser ang patilya (buhok ibabaw sa dunggan) sa iyang dunggan.
Dugang alegasyon sa mga reklamante nga kanunay nga mangwitik sa daladalahong stick ang maong magtutudlo maong nagbaton karon og kahadlok ang mga estudyante. Ilaha kining gisumbong ngadto sa principal nga si Wilfredo Besabelle ug gipasaligan siya nga ipatawag sila ug ang maestra aron magkaatubang sa office.
Apan matod ni Teresita nausban na lang kini wala mahitabo ang maong pagpatawag sa opisina sa principal. Ning ikaduhang higayon, miadto sila pagbalik sa opisina sa principal apan wala kini didto maong milahos nalang sila sa police station aron magpa-blotter.
Samtang si Department of Education regional director Carmelita Dulangon dihang nahinabi sa Banat News nagkanayon nga gidili gyud sa usa ka magtutudlo ang pagpanapat sa ilang tinun-an bisan unsa pa sila ka badlungon.
Bisan na ang pagpangasaba ug dalang pagpakauwaw sa bata gidili usab subay sa RA 7610.
Matud ni Dulangon nga bukas sila pagdawat sa maong reklamo apan karong giduso na kini sa Ombudsman magpaabot na lang sila sa resulta niini. (Darrel A. Carumba/EIM) (BANAT NEWS)