CEBU, Philippines - Nadakpan sa kapolisan ang duha ka gidudahang drug pusher didto sa Poblacion, lungsod sa Pinamungahan niadtong Lunes sa ala 1:00 sa hapon.
Ang nadakpan atol sa ronda mao si Johnny Echavez, 26, ulitawo, ug molupyo sa barangay Lamac Pinamungajan.
Samtang ang iyang angkas sa motor mao ang bayong-bayong nga 17 anyos nga iyang ig-agaw nga nagtungha sa college.
Si PO2 Marciano Suarez Jr., sa Pinamungajan Police Station mibutyag sa Banat News nga ang ilang buhatan sayo niini, nakadawat og tawag sa telepono gikan sa nagpailang concern citizen ug nagpahibawo bahin sa mga transaksiyon sa gidiling drugas sa maong lugar.
Sa pagrespondi sa kapolisan, nabungkag ang mga pundok- pundok sa mga tawo sa maong dapit ug nag- iyahay sa pagpahilayo.
Samtang ang nadakpan nga suspek mipadagan na unta sa iyang motor angkas ang bayong-bayong niyang ig-agaw dihang maoy pag-abot sa patrol car sa kapolisan .
Didto gipahunong dayon kini ug dihang namatikdan nga ang batan-on may gi- kumkom sa iyang kamot .
Gikuha ang kawo sa suspek ug didto napalgan niini ang usa ka bulto nga gituohang shabu, samtang ang bayong-bayong nakuhaan usab og mga linikit nga dahon sa marijuana .
Diha-diha gidakop ang mga suspek ug gibalhug sa karsel samtang gihikay ang kasong ipasaka batok kanila. (BANAT NEWS)