CEBU, Philippines - Usa ka Arabo ang napalgang patay sud sa kasilyas sa iyang giabangang balay diha sa Townhouse, Woodcrest, Barangay Guadalupe niaging Miyerkules sa buntag.
Ang langyaw giila nga si Alhemli Abdullah Saleh, 55-anyos nga Arab national nga dunay postal address nga corner sitio Lanao, Idao District, Tagbilaran City, Bohol.
Base sa imbestigasyon, ang patay’ng lawas ni Saleh napalgan sa duty guard nga si Jay Abraham, 28, sakop sa Archangel Security Agency.
Si Abraham, kinsa nagtrabaho sa 6 pm-6am shift, ang nag-roving pasado alas onse sa buntag nakamatikod sa tubig nga nag-agas likod sa balay sa biktima.
Ang gwardya milili sa bintana sa maong balay ug nakit-an ang telebisyon ug ang aircondition unit nga nag-andar.
Milili usab siya sa nagsilbing bintana sa pultahan ug iyang nakit-an ang langyaw naghigda pakulob sud sa kasilyas.
Dali niyang gipahibalo ang maintenance in-charge nga si Isidro Balas kinsa mao usab ang mipahibalo sa ilang manager ug nagpatawag sa Homicide Section.
Gawas sa nagbanaw nga tubig sa sawog, way nakitang timailhang dunay komosyon o kagubot nga nahitabo sa mga butang sulod sa maong balay.
Wala usab mahanaw ang cellular phone, tablet, laptop, cash nga P8,790, ug uban pang butang ni Saleh. Subayon pa sa kapolisan kung unsa nga national si Saleh aron mapahibalo ang embahada niini sa iyang gidangatan.
Sa pagkakaron wala pay gibuhiang opisyal nga pamahayag ang kapolisan kung unsay gikamatyan sa maong langyaw sanglit wala pa kini gi-autopsiya.(Niña G. Sumacot/EIM) (BANAT NEWS)