CEBU, Philippines - Wala mobutho si Gobernador Gwendolyn Garcia sa unang adlaw sa pagbalik niya sa Kapitolyo kagahapon gikan sa pagkasuspenso sud sa unom ka buwan niadtong Lunes.
Si Bise-Gob. Agnes Magpale mipahibawo nga wala na siya namirma og mga dokumento may kalabutan sa iyang katungdanan isip acting governor tungod sa kabalakang mapasanginlang nanapaw og trabaho.
Ang tinubdan sa Banat News mipahibawo nga si Garcia atoa pa sa Manila nunot sa gikatakdang husay sa kaso sa Sandiganbayan karong adlawa. Hayan wala gihapo’y gobernador ang lalawigan sa Sugbo karong adlawa.
Si Magpale mipasalig nga andam siya mobalik isip kasamtangang gobernador sa higayon nga mandoan siya sa Department of Interior and Local Government kung ugaling nakasang-at og vacation leave si Garcia. Ang termino ni Garcia mapupos karong Hunyo 30 dayon mopuli kaniya ang bag-ong gobernador nga si Hilario Davide III samtang si Magpale ang bise-gobernador.
Ang Department of Interior and Local Government miingon nga makonsiderar nga absent without official leave (AWOL) si Garcia kay wala sila makadawat og pahibalo nga mag-leave siya kagahapong adlawa.
Matud pa ni DILG-7 Regional Director Ananias Villacorta angayan untang nabalik na si Garcia sa Kapitolyo ug nagpahibaw na sa mga department heads sa iyang pagbalik.
Dugang pa ni Villacorta wala siya makadawat og application for leave ni Garcia apan tan-awon pa niya sa ilang Central office basin gidiretso og sumitir ni Garcia ang iyang application tungod kay ang mopirma niini mao si DILG Secretary Mar Roxas. (BANAT NEWS)