CEBU, Philippines - Patay nang napalgan sa iyang mga kaubanang piniriso ang usa ka binilanggo sulod sa iyang selda sa Cebu City Jail kagahapon sa alas 5:15 sa buntag. Ang maong bilanggo gituohang adunay deperensiya sa pangisip kinsa migamit og malong nga gipisi ug gihigot sa iyang liog .
Ang nagpakamatay nga piniriso mao si Reegan Nacorda Dano, 23, ulitawo, ug molupyo sa Sitio Colis sa barangay Quiot, ning dakbayan sa Sugbo. Ang maong bilanggo nag-atubang sa kasong murder tungod sa pagdunggab patay niya sa usa ka babaye didto sa San Carlos Heights niadtong buwan sa Marso.
Apan siya nadakpan og nabalhug sa Cebu City Jail niadtong Abril 4, 2013.
Matud ni Jail officer Michael Angelo Singson dihang nahinabi sa Banat News, ang kaubang piniriso nga si Edwin Suque maoy unang nakadiskobri ni Dano nga nagbitay na sud sa selda nga wala nay panimuot.
Naklaro ang gipisi nga malong nga maoy gigaid sa iyang liog ug ang pikas tomoy gihikot sa ibabaw nga bahin sa selda. Sa pagsusi sa mga jail guard nasuta nga patay na kini ug wala na madala pa sa tambalanan.
Samtang gibutyag ni jail warden Johnson Calub nga adunay deperensiya sa panghuna- huna ang maong piniriso.
Aduna usab kini gi -maintain nga tambal ug gani gitakda unta kining dad-on og balik sa Vicente Sotto Memorial Medical Center (VSMMC) karung semanaha. Dugang pa ni Calub nga namatikdan sa gihimo nilang pakisusi nga kanunay nga maghinuktok si Dano nga maghuna –huna sa iyang pamilya. (/WC) (BANAT NEWS)