CEBU, Philippines - Nabuslot ang sampot sa usa ka batan-ong lalaki human kini pusila sa iyang silingan nga maoy nagbantay sa fishpond nga buot unta niining kaligoan sa sitio Tipolok, barangay Babag, dakbayan sa Lapulapu sa miaging udto.
Ang biktima mao si Raymond Baguio, 18, ulitawo, ug ang nakapusil mao si Marcelino Ochea, 34 , minyo, nga silingan sa biktima ug piniyalan sa fishpond nga gipanag-iya sa usa ka Don Benidecto nga nahimutang sa maong dapit.
Matud pa ni PO2 Winston Ybañez sa homicide section sa kapolisan sa maong dakbayan nga ang biktima nga ilang gisukit-sukit mialigar nga kuyog niini ang lain pa nilang silingan nga mangaligo unta sa maong dapit dihang nakabati sila og mga buto-buto sa armas.
Gibati sila og kahadlok busa nanagan sila apan nahunong ang biktima dihang kalit nga mibanhod ang iyang sampot.
Kalit siyang naluya dihang sa paghikap niya niini nabulit sa dugo ang iyang kamot . Nasuta niya nga siya ang naigo sa bala sa armas de fuego nga gipabuto sa nagbantay sa maong fishpond.
Gihatud dayon ang biktima ngadto sa Lapulapu District Hospital aron matambalan. Dugang pa ni PO2 Ybañez nga ang suspetsado nga si Ochea nga ilang gisukitsukit mialigar usab nga makadaghan na mahitabo nga ang bunga sa ilang lubi ug mga saging nga gitanom dapit sa fishpond nga iyang gibantayan kanunay lang gipangawat. (BANAT NEWS)