Depektosong electrical outlet gituohan nga hinungdan sa sunog sa A. Lopez St.

CEBU, Philippines - Depektusong electrical outlet ug wala maibot nga mga appliances ang posibleng hinungdan sa pagkasunog sa panimalay sa pamilyang Miego niadtong Huwebes sa kaadlawon diin ang magtiayong Eduardo ug Margarita namatay.

Sa pakighinabi sa Banat News ni FO3 Emiliano Daño, ang arson investigator sa Bureau of Fire Protection sa Cebu City mipadayag nga sa ilang nakuhang impormasyon gikan sa ilang saksi, nga adunay mga higayon nga ang outlet sa panimalay sa pamilyang Miego  kalit nga mo-spark, nagtuo silang depektoso kini.

Apan gawas niini, nagduda usab si Daño nga dunay wala maibot nga mga nakasaksak nga appliances sa sala nga bahin sa panimalay nga nag-overheat ug miulbo ang sunog.

Napanglantawan usab ni Daño nga misuway unta sa pag-ikyas si Margarita Miego apan wala na kini makaabot pa dihang naabtan kini sa kalayo uban ang iyang bana.

Matud pa ni Daño padayun pa ang ilang pagkolekta og mga impormasyon aron masuta ang hinungdan sa sunog.

Gipadayag usab ni Daño nga nagsugod ang kayo diha sa sala nga bahin sa panimalay sa pamilyang Miego diin  nahimutang ang mga lawas sa magtiayon.

Moabot sa 21 ka panimalay ang nasunog niadtong tungura diha sa A. Lopez barangay Labangon ug laing duha usab ka panimalay ang diriyot maugdaw. (/EIM) (BANAT NEWS)