CEBU, Philippines - Usa ka runner sa shabu ang nasikop sa kapolisan sa Casuntingan Police Station human kini maaktohing naghupot og tube sa ballpen nga ang sulod mao ang illegal nga drugas. Si Drandreb Cobarde, 26, taga Sitio Orel sa Brgy. Casuntingan sa dakbayan sa Mandaue kinsa giingong padung na untang mo-deliver sa usa ka gamay’ng pakete sa shabu sa usa sa mga empleyado sa usa ka establisimento sa maong dapit.
Matud pa ni Casuntingan Police chief Sr. Insp. Ramil Morpos nga nadiskitahan ang maong illegal nga binuhatan ni Cobarde tungod sa impormasyon sa usa ka concerned citizen nga mipahibawo sa style sa delivery sa suspek diha sa maong dapit.
Si Cobarde giingong miangkon sa kapolisan sa iyang ilegal nga binuhatan ug siya maoy nagsuplay sa shabu sa Sitio Orel.
Kasong pagpayuhot og illegal nga drugas ang ipasaka sa nahisgutang suspetsado kinsa nagtingkagol na karon sa Casuntingan Police Station. (FREEMAN)