DOH mipahimangno sa publiko paggamit og limpyong tubig

CEBU, Philippines - Gipahimangno  sa buhatan sa Department of Health (DOH) 7 sa publiko  sa pagsiguro sa limpiyong tubig nga  mainom  karong  mibalik  na   ang panahon sa tinguwan.

Gihimo ang maong pahimangno sa tuyo nga kalikayan   ang  sakit  nga kalibanga  gumikan  sa  pag-inom sa kontaminadong tubig nga gikan sa tubod o atabay sa ilang dapit.

Ang  pagsiguro  sa  katawhan sa lalawigan sa Sugbo sa pag-inom sa limpiyong tubig nakaaghat usab kang 6th District Board Member Thadeo Ouano sa pagpalabang sa ordinansa nga gitumong alang sa pag-establisar sa Cebu Province Water Sanitation  Standards. Si Ouano sa iyang ordinansa miingon nga gitinguha sa kagamhanan sa lalawigan ang pagbaton sa katawhan og limpiyong tubig nga mainom nga makuha gikan sa mga water works system sa dakbayan, kalungsoran ug hangtod ang gikan sa mga refilling stations.

Gipasabot niya nga gitumong ang maong ordinansa alang sa pag-umol sa Cebu Province Water Sanitation Monitoring Board nga pagalangkoban sa gobernador isip maoy molingkod nga chairperson uban sa vice chairperson nga pangulohan sa pangulo usab sa Integrated Provincial Health Office sa lalawigan.

Ang mga sakop sa hunta nga maestablisar mao ang naggikan sa Provincial Environment and Natural Resources Office, Department of Health (DOH) liga sa mga mayor sa lalawigan, liga sa mga barangay kapitan sa lalawigan, Local Water Utilities, Association of Water Refilling Stations ug uban pa.

Matud pa niya nga gikinahanglan kaayo sa kagamhanan ang paghimo og mga lakang alang sa higpit nga pagsusi sa kahimtang sa pagpadagan sa mga establisamento nga ang tubig nga ilang gidalit dili lang barato ang presyo  kundili   luwas usab sa panglawas sa mga tawo nga makainom niini.  (BANAT NEWS)