CEBU, Philippines - Ang hapit tanang bilanggoan dinhi sa tibuok Central Visayas nga gidumala sa Bureau of Jail Management and Penology (BJMP) naghuot sa kapin sa 7,000 ka binilanggo.
Base sa labing ulahi nga statistics nga nakuha sa Banat News nasayran nga usa ra sa 31 ka prisohan ang wala maghuot ang iyang mga binilanggo, apan wala ibutyag kun unsa kini nga bilanggoan.
Ang tanang selda sa mga binilanggo adunay 9,884 metros kwadrados nga gidak-on ug angay unta nga estahan lang kini og 2,101 ka piniriso apan kay 7,532 man ka binilanggo ang nag-ukopar, nagsinardinas ang ilang kahimtang.
Sa Cebu City Jail nga nahimutang sa Barangay Kalunasan, matud ni warden Johnson Calub nga 2,052 na ka binilanggo ang anaa natanggong nga unta ang mao nga bilanggoan gitukod alang ra sa 1,500 ka binilanggo.
Kadaghanan sa mga nabilanggo, bisan sa ubang dapit sa nasud, nag-atubang og kaso nga may kalambigitan sa illegal nga drugas.
Sa dul-an sa 8,000 ka binilanggo dinhi sa Central Visayas, 3,104 kanila ang nag-atubang og kaso nga may kalambigitan sa illegal nga drugas.
Ang 2,014 kanila nag-atubang og kaso sama sa pagpatay, pagpanglugos, pag-angol sa usa ka tawo, samtang 3,500 usab ang nakahimo og krimen batok sa kabtangan sama sa pagpangawat ug tulis.
Base gihapon sa statistics nasayran nga labing daghan sa mga nabilanggo nagpangedaron gikan sa 18 ngadto sa 46-anyos.
Kadaghanan sa mga binilanggo wala pa makonbikto sa ilang mga kaso.
Sa dul-an sa 8,000 ka binilanggo adunay siyam kanila nga milapas na ang gidugayon sa ilang pagkapriso sa angayang isentensya kanila kun sila makonbikto.
Nahibaw-an usab nga adunay 18 ka langyaw nga nabilanggo sa lainlaing bilanggoan nga gidumala sa BJMP dinhi sa tibuok rehiyon-7.
Ang 31 ka bilanggoan nga gidumala sa BJMP gibantayan usab og 684 ka jail guards. (BANAT NEWS)