48 priso nga nalanag sa litson sa Danao City Jail naulian na

CEBU, Philippines - Naka- recover na ang 48 ka mga piniriso sa Bureau of Jail Management and Penology kon BJMP didto sa siyudad sa Danao nga nalanag sa gikaong litsong baboy niadtong Domingo nga pinalit sa kabanay sa usa sa mga piniriso nga nag- birthday niadtong tungora.

Gibutyag ni Dr. Pobleo Piedad ang City Health Officer sa siyudad sa Danao nga nahinabi sa Banat News nga sa 48 ka mga piniriso sa maong bilanggoan nga gisakitan og tiyan ug gikalibanga, duha na lang ang pabiling gi-dextrose.

Matud ni Piedad nga diha lang nila gi-confine sa bilanggoan ang maong priso tungod sa seguridad.

Gitataw  ni Piedad nga ang gikaon nga lechon nga gibangka sa piniriso nga si Edwin Ebalya, 58,  nga nag birthday niadtong tungura maoy gitumbok nila nga nakaingon sa food poisoning tungod kay mao man kini ang katapusan nilang gikaon ug nanakit dayon ang ilang mga tiyan. Gawas sa dextrose gipatomar og tambal ang mga pasyente ug inanay silang naka-recover.

Hinuon gikuhaan na og mga food sample ang mga pasyinte ingon man rectal swab,  ug ang sample sa ilang tubig aron matino gyud sa laboratory examination kung ang lechon ba gyud ang hinungdan.

Kagahapong adlawa nagtigum sila si Peidad, City Veterinarian Dr. Roque Noya,  Jailwarden Insp. Dungog apil na si Renan Cimafranca ang Regional Epidemiology Surviellance Unit officer sa Department of Health.

Karun pang Lunes mogawas ang resulta sa laboratory test sa mga sample nga nakuha gikan sa prisohan. (/EIM) (BANAT NEWS)