CEBU, Philippines - Usa ka ‘Special Investigation Task Group’ ang gitukod aron tutukan ang kaso sa pagpatay sa konsehal sa lungsod sa Argao nga si Argao Councilor Joaquin Banosong.
Ang hepe sa kapolisan sa lalawigan sa Sugbo, Sr. Supt. Patrocinio Comendador miingon nga aduna na sila’y gitan-aw nga listahan sa mga posibleng responsabli sa pagpamusil patay kang Banosong. Gani, gawas sa personal nga panagbangi, ang motibo sa negosyo maoy usa usab sa ilang gitutukan karun tungod usab kay aduna man kini lending firm si Banosong.
Gipadayag usab ni Comendador nga ang task group nga gilangkuban sa Criminal Intelligence Branch, Crime Scene Investigation Unit ug Investigation and Detective Management Bureau maoy gitahasan aron mapadali ang pagsulbad sa maong kaso.
Wala isalikway sa task force ang posibilidad nga mga guns-for hire ang mitira kang Banosong. Gipadayag usab ni Comendador nga adunay daghang tawo nga nakakita atol sa maong insidente hinungdan nga mihimo sila karun og composite sketch aron mapakita ngadto sa mga witness ug kun si kinsa ang maong mamumuno.
Kahinumduman nga niadtong Lunes sa hapon, si Banosong mihapit sa merkado sa lungsod sa Argao aron mamalit og isda ug dihang mibalik na kini sa iyang sakyanan giduol kini sa usa ka lalaking nagsuot og bonnet ug midul-it pagpusil sa iyang ulo. (BANAT NEWS)