CEBU, Philippines - Dunay duha ka tawo dinhi sa dakbayan sa Sugbo nga bag-ohay lang nadiskubrehan nga may full-blown nga kaso sa Acquired Immune Deficiency Syndrome (AIDS).
Si Dr. Ilya Tac-an nga maoy hepe sa Sexually-Transmitted Diseases sa City Health Department nagkanayon nga pulos lalaki ang bag-ong carrier sa AIDS dinhi sa dakbayan.
Samtang gawas sa duha nga adunay full-blown AIDS cases, adunay 66 ka bag-ong kaso sa Human Immunodeficiency Virus (HIV) nga nadiskobrehan usab dinhi sa dakbayan sa Sugbo sa unang upat ka buwan karong tuiga.
Matud ni Ygoña nga kapin sa 3,000 ka tawo ang nagpahiling sa ilang panglawas pinaagi sa gitawag og HIV anti-body test ug namatud-an nga ang 66 kanila positibo na sa HIV.
Sila gitambagan nga likayan ang pagpakighilawas aron nga dili makapatakod sa laing tawo.
Gipahimangnoan usab ni Ygoña ang katawhan ilabi na kadtong mga dukirok kaayo sa mga babaye nga magbantay aron dili matakdan. Ang HIV maoy sinugdanan sa AIDS. (BANAT NEWS)