Gob.Marañon mideklarar og all-out war vs gambling lords

BACOLOD CITY, Philippines –Mideklarar og “all-out war” batok illegal gambling si Negros Occidental Governor Alfredo Maranon Jr. ug gimandoan ang kapolisan sa probinsya sa paglutos sa mga illegal gambling lords sa ilang lalawigan.

Si Senior Supt. Ricardo de la Paz, acting Negros Occidental Provincial Police Office (NOPPO) director, mibisita na sa buhatan ni Marañon ug mipahibalo nga sud sa milabay’ng lima ka adlaw 19 ka mga operasyon kontra ilegal nga sugal na ang ilang nahimo, 22 ka tawo na usab ang ilang nadakpan nga nalambigit niini. Lima niini didto sa Escalante City, diin giingong nagbase ang mga big-time financiers ug nag-operate og illegal numbers game sama sa jai-alai. Giingong adunay mga politiko nga protektor ang maong mga financiers.

Lakip sa mga malampusong operasyon gihimo diha sa  San Carlos, Escalante, Sagay, Cadiz, Victorias, Calatrava; ingon man sa Isabela, Cauayan, ug Kabankalan. Apan bisan pa man niini, wala matagbaw ang gobernador sa kalampusan sa kapolisan tungod kay pulos mga sensilyo lang sa mga dagkong illegal gambling operators ang mga nadakpan ug dili ang mga “dagkong isda.”

Matud pang De la Paz aduna nay listahan ang NOPPO kun si kinsa kadtong mga big-time financiers ug operators  og illegal numbers game sa probinsya, pipila kanila giingong mga iladong mga tawo.

Gimandoan karon ni De la Paz ang 31 ka police chiefs sa probinsya sa pagpahigayon og walay hunong nga operasyon batok sa maong mga gambling lords. (BANAT NEWS)