3 tinun-an sa USC nag-top sa CPA Board

CEBU, Philippines - Tulo ka mga Sugbuanon ang naapil sa top ten sa bag-ohay lang natapos nga  Certified Public Accountant (CPA) Board Examination nga gipagawas kagahapon sa Professional Regulatory Commission (PRC).

Ang maong mga bag-ong accountants pulos gradwado sa University of San Carlos  nga giilang sila si Mikyll Hum Dalimot Narvios, nga nigradwar isip Summa Cum Laude, maoy nakakuha sa ikaduhang dapit nga dunay average nga 95.43.

Si Wendell Kho Ang, nga migradwar isip Magna Cum Laude, maoy nakakuha sa ikaupat nga dapit nga adunay average nga 93.71 samtang si Arianne Cañon Fernando, nga mitapos isip Summa Cum Laude, maoy nabutang sa ikanapulo nga dapit nga adunay average nga 92.29.

Matud pa ni Atty. Christopher Malaya, ang chairman sa Department of Accountancy sa USC-Main Campus tulo ka sagunson nga mga tuig, naka-produce sila og tagtulo ka top notchers.

Ang nakakuha sa unang dapit mao si Richard Baguio Saavedra sa Ateneo De Davao University nga nakakuha og 96 nga average samtang si Tom Braian Aguilar sa University of Baguio maoy nakakuha sa ikatulong dapit sa average nga 94.

Ang nabutang sa lima hangtud sa napulo nga spots mao sila si Jaymar Pelin Dumagsa sa Western Leyte College-Ormoc (93.57), Russel Aaron Ailes sa Ateneo De Naga University (93.29) ug Hazel Valerie Sy sa De La Salle University-Manila (93.29), Jon Vincent Ong sa DLSU-Manila (93.14), Glen Dareen Santos sa Xavier University (92.71), Kathleen Samonte sa DLSU-Manila (92.43) ug si Jay Ronald Lluvido sa Holy Name University-Tagbilaran (92.29).

Sumala pa sa PRC nga 1,553 lang sa 5,665 ka mga mikuha sa pasulit ang nakapasar niadtong Mayo 19-20, ug 26-27. (BANAT NEWS)