CEBU, Philippines - Gisugdan na sa mga kabomberohan dinhi sa Sugbu ang ilang Oplan Balik Eskwela nga ang tumong mao ang pag-inspeksyon sa mga tunghaan, dormitoryo, ug boarding houses nga mao’y puy-anan sa mga estudyante karong umaabot nga tingklase.
Kini pinasubay sa lagda sa Fire Code of the Philippines sumala pa ni FO2 Wendel Villanueva, Public Information Officer sa Provincial Fire Marshal nga nakahinabi sa Banat News.
Nasayran nga daghang mga boarding houses sa dakbayan ang karaan na kaayo ug ginama sa mixed materials apan padayon gihapong nanawat og mga boarders ilabi na mga estudyante.Sumala pa ni Villanueva nga gawas sa pagkuha og business permit kinahanglang aduna say Fire Safety Inspection Certificate ang mga boarding houses. Kini usa ka pagmatuod nga nainspeksyon sila ug mituman sa Fire Safety Code of the Philippines.Ang mga rekisitos aron makakuha sa maong certificate mao nga kinahanglang aduna gyu’y fire exits, fire extinguishers, saktong electrical connections nga gitaod sa lisensyadong electrician ang mga boarding houses. Kadtong masakpang dunay mga kalapasan sa lagda isyuhan og notice to correct violations nga kinahanglang tumanon sud sa 15 ka adlaw ang magmagahi pagsunod niini irekomendar sa BFP nga ipakanselar ang ilang business permits.Samtang mitambag ang BFP sa mga ginikanan ug mga tinun-an nga taga lagyong lugar nga di irisgo ang kinabuhi niadtong mga baratuhon apan peligro kaayong mga boarding houses. (BANAT NEWS)