CEBU, Philippines - Usa ka opisyal sa simbahan nagkanayon nga nalipay ang simbahan sa pagkadaug ni re-elected Mayor Michael Rama ug vice mayor-elect Edgar Labella sa eleksyon, kay ang duha ka opisyal suod ug duol man sa simbahan.
Si Monsignor Esteban Binghay, ang Episcopal vicar sa Archdiocese of Cebu, nag-ingon nga tungod kay suod sila sa simbahan, dali ra silang maka-coordinate sa city government.
Dugang pa ni Binghay nga ang Cebu City maoy host unya sa International Eucharistic Congress (IEC) sa Enero 2016, ug ang simbahan nagsugod na sa pag-andam alang sa maong dakung kalihukan.
“Nalipay ang simbahan nga nakadaug si (Michael) Rama ug (Edgar) Labella, kay they are closer to the Church, especially now that we are preparing for the International Eucharistic Congress,†matud pa ni Binghay.
“Kung ang mayor layo-layo sa simbahan, maglisod ta og coordinate. Si Rama suod kaayo sa simbahan. And since Cebu City is the host, it is easier for us to deal with the City government regarding the preparations of the event,†dugang pa ni Binghay.
Si Rama ug Labella maoy gi-endorsar sa Lay Initiatives for Life (LIFE) atol sa campaign period sa wala pa ang piniliay.
Sumala pa ni Binghay nga si Rama nangunay gyud pag-adto sa Roma alang sa canonization ni San Pedro Calungsod ug grabe kaayo ka suporta sa mayor atol sa National Thanksgiving Mass nga didto gihimo sa South Road Properties.
“He (Rama) already knows what to do, we have the same wavelength especially on the things needed for certain big religious gatherings,†matud niya.
Ang International Eucharistic Congress usa ka gipaabot nga international event, ilabi na kay dunay dakong kahigayonan nga tambongan kini ni Santo Papa Francis.
Dili pa lang dugay, namahayag si Cebu Archbishop Jose Palma nga nakadawat sila og sulat gikan sa IEC president on Pontifical Committee Msgr. Piero Marini nga misugyot sa pag-uswag sa buwan sa IEC, aron mahaom sa schedule sa Santo Papa. Si Palma, mao say pangulo sa Catholic Bishops Conference of the Philippines (CBCP), nagtuo gyud nga interesado gyud ang Santo Papa sa pag-anhi dinhi sa Sugbo.
Samtang giklaro ni Binghay, nga ang defeated mayoralty candidate ug outgoing Congressman Tomas Osmeña hasta ang iyang asawa nga si Margot, mga maayo pud nga mga Katoliko, apan kung ikumpara, mas suod gyud si Rama sa simbahan.
“Silang Tomas (Osmeña) okay man pero Rama is closer gyud, mas suod gyud siya sa simbahan,†matud ni Binghay. (BANAT NEWS)