Capitol may pundong P300 milyones

CEBU, Philippines - Gipasalig sa kasamtangang gobernador, Agnes Magpale, nga may pundo  nga balor og P300 milyones ang panudlanan sa lalawigan sa Sugbo inig lingkod  sa bag-ong gobernador Hilario Davide III  karong Hulyo 1.

Matud pa ni Magpale nga ang maong pundo natigum gikan sa Internal Revenue Allotment (IRA) gikan sa nasudnong kagamhanan nga dawaton sa lalawigan matag buwan sa kantidad nga P150 milyones.

Sayo niini si Magpale mibutyag nga sa dihang milingkod siya isip acting governor human masuspenso si Gob. Gwendolyn Garcia, P90 milyones lang ang nahabilin sa panudlanan sa Kapitolyo samtang ang bayranang  mga  utang mikabat    og P900 milyones.

“At least naa na’y kwarta,” matud pang Magpale.

Gawas sa mga proyekto nga  balor og P700 milyones, matud pa ni Magpale nga nabayran na ang ubang obligasyon sa Kapitolyo nga kompleto sa mga dokumento.

Ang Provincial Treasurer’s Office andam na nga mopagawas sa mga tseke balor og P200 milyones alang  sa uban pang bayronon lakip na ang P57 milyones nga equity sa lalawigan sa Sugbo  alang sa Carmen Bulk Water Project.

Ang maong bayronon aduna nay pagtugot sa pre-audit division, sumala pa ni Magpale.

Gibahin sa tulo ni Magpale ang nangaging transaksiyon ni Garcia nga iyang napanunod sama sa nahuman na nga proyekto; sugdanan na nga proyekto ug ang anaa pa sa plano.

“(Provincial Administrator) Habin earlier said, yes the suspended governor has the most number of projects gyud hinoon but wa ta kahibawo nga utang diay na tanan,” matud pang Magpale.

Nunot niini, itugyan ni Magpale ngadto kang Davide kung unsay iyang buhaton sa mga proyekto ni Garcia nga anaa pa sa plano sa buhatan sa Provincial Planning and Development Office. (/WC) (BANAT BALITA)