Mibayad og nanguntol nga tseke

CEBU, Philippines - Kasong estafa ang ipasaka batok sa suspetsadong nagpailang Aljhon Abrenica kinsa miisyu og untol nga tseke ngadto sa mokabat sa 17 ka establisamento.

Ang mga tindahan ug department stores nga nangailad nahimutang sa dakbayan sa Lapulapu, dakbayan sa Mandaue, dakbayan sa Sugbo ug lungsod sa Minglanilla.

Matud pa nga ang gibayad nga tseke sa gipa-deliver niini nga mga produkto gikan sa maong mga tindahan  sa miaging semana sa dayon na sa  adlaw sa May 13,  2013 election pulos miuntol sa bangko.

Base sa imbestigasyon mokabat sa P6 milyones nga kantidad sa tseke ang gi-isyu sa suspek gikan sa China Bank ug Malayan Bank. Matud pa nga si Abrenica mi-order sa maong mga produkto niadtong Mayo 8 ug pagka Mayo 11  niining tuiga wala na kini mobalik sa maong panimalay nga ilang giabangan.

Lakip sa gipangita ang duha ka kaubang babaye sa suspek nga nakuhaan og hulagway sa nagpaila nga Faith Booc Baya ug Anabelle Booc Igot  ug laing tulo pa ka mga lalaki.

Ang mga gipang-order sa maong suspek naglakip sa mga construction materials, roller blinders, mga computers, copying machine, pintal, linatang pagkaon, mga  accessories Johnsons and Johnsons products  ug uban pa.

Kini giingong gipahatud sa suspek sa giabangan niining panimalay sa Casa Nuestra Subdivision sa Bangkal sa dakbayan sa Lapulapu.

Lakip sa nabiktima sa grupo ang tag-iya sa giabangan niining balay tungod kay giingong miuntol gihapon ang P30,000 nga tseke niini nga gibayad.

Si Senior Superintendent Rey Lyndon Lawas, director sa kapolisan sa maong dakbayan namahayag padayon pa silang nangita sa suspek

Si SPO2 Frederick Eslit, imbestigador sa Theft and Robbery Section (TRS) sa Lapulapu City Office (LLCPO) nga nahinabi sa mga tigbalita nagkanayon  nakakuha sila og hulagway sa nagpaila nga Faith Booc Baya ug Anabelle Booc Igot nga giingong kauban ni Abrenica  sa Avon Cosmetic  sa Pajo  branch sa maong dakbayan diin usab kini mi-apply isip miyembro.

Sa Bureau of Internal Revenue (BIR) maoy ilang nakuha ang mga detalye sa pagkatawo ni Abrenica nga nag-ingong nahimugso niadtong 1975 sa Turong, Bulacan ug tulo ka mga address ang gidala niini nga naglakip sa Bocaue , Bulacan, Talisay sa  Batangas ug Bangkal, dakbayan sa Lapulapu. (Romeo Limpangog/EIM) (BANAT BALITA)