CEBU, Philippines - Barangay Kapitan sa barangay Mabini sa Cebu City napalgang patay sud sa iyang gisakyang pickup diha sa sitio Tigbao sa barangay Talamban kagahapon sa hapon.
Ang patay’ng lawas ni Kapitan Rey Oybenes napalgan sulod sa usa ka Gray nga Toyota Hi-Lux pickup. Si Oybenes adunay usa ka samad pinusilan sa iyang walang dughan.
Giila ang kapitan sa iyang asawa nga si Jessebel Oybenes ug sa mga anak nga miadto sa lugar human mahibaw-i ang nahitabo.
Ang team leader sa Homicide Section sa Cebu City Police Office nga si SPO1 Victor Ruel Ayuman nagkanayon nga ilang ipaubos sa awtopsiya ang lawas sa kapitan ug ipaubos kini sa paraffin test aron masuta kung naghikog ba gyud siya o dunay laing tawo nga maoy nagpatay kaniya.
Apan nagkanayon si Ayuman nga base sa inisyal nilang pagsusi dako ang posibilidad nga naghikog gyud si Oybenes. Ang pusil nga gituohang gigamit paghikog napalgan sa paa ni Oybenes, duol sa iyang tuong kamot.
“Nagtuo ko magpaayo ra sa iyang plaka kay naa ma’y autoshop likod sa akong gitrabahoan. Unya kay wa ma’y ilhanan nga naay tawo so akong gipatan-aw sa akong amigo. Ingon siya nga naa’y pusil sa paa,†matud pa ni Asuzena Solon , street sweeper sa Talamban.
Ang pagkakaplag kang Oybenes nahitabo upat ka oras human maalarma ang Cebu City Police Office kabahin sa tawag gikan sa hepe sa Asturias Police Station nga si Insp. Hugo Rio Ipong.
Gisusi pa karon sa kapolisan kung may koneksyon ba si Oybenes sa patay’ng lawas sa usa ka babaye nga gilabay diha sa bakilid sa Transcentral Highway sa Sitio Curos-Curos, Barangay Cansumoroy, sa lungsod sa Balamban kagahapon sa udto.
Si Ipong mibutyag sa The Freeman (igsuong pamantalaan sa Banat News) nga sakay siya sa ilang patrolcar padung sa Cebu City aron unta motambong sa gipatawag nga command conference sa Cebu Provincial Police Office (CPPO) sa Sudlon, Lahug dihang iyang nasigpatan ang usa ka Toyota Hi-Lux.
Matud pa niya usa ka drayber sa usa ka V –Hire ang mipara kaniya ug mipahibalong kadudahan ang lihok sa drayber sa maong Toyota Hi-Lux.
“Gihunong mi sa driver sa v-hire kay gipahibalo mi atong Hi-Lux,†matud pang Ipong. Diha-diha milabay ang Hi-Lux sa patrol car padung sa Cebu City maong gigukod kini ni Ipong gibana-banang ala- 1:30 sa hapon. Pag-abot sa Barangay Gaas, diha na mitawag si Ipong sa Provincial Public Safety Company ug sa iyang mga sakop sa Asturias Police Station sa pagbutang og road block, apan tungod sa kahinay sa signal wala siya maka-kontak.Gigukod nila ang pickup hangtud sa barangay Cantipla apan nakaipsot gyud ang Hi-Lux nga gituohang milusot sa Ayala Heights dayon mi-left turn padung sa sitio Tigbao, Talamban.
Paglabay sa upat ka oras napalgan ang usa ka Hi-Lux sa maong lugar nga ang sakay mao si Kapitan Oybenes.
Matud pa nga usa ka lalaking luwan sa usa ka gray-colored Toyota Hi-Lux nga nagtangag og “For Registration†ang giingong nakit-an sa usa ka Baroy Legastino, drayber sa L300 V-Hire nga dunay giguroy padung sa maong bakilid.
Si SPO3 Arvie Banate, ang imbestigador sa Balamban Police Station miingon nga dunay usa ka samad pinusilan sa walang bahin sa dughan ang babayeng gibanabanang 25 ngadto sa 30-anyos, kasarangan ang pamanit, blonde ang buhok, ug gibanabanang 5’2†ang height nga nagsuot og green blouse ug pantalon.
Giingong usa ka empleyado sa Cebu City Hall ang maong babaye nga usa ka biyuda apan wala pay kompirmasyon gikan sa kapolisan. Usa ka uniporme nga dunay logo sa NAPOCOR ug may name cloth nga Neri, A.D.
Si Ayuman igo lang mihatag og pamahayag nga ang kolor sa sinina ni Oyberes ug ang Toyota Hilux nga gigukod ni Ipong sa Balamban pasado ala-una sa hapon kagahapon may pagkaparehas.
Wala pa matino kung mag-komboya ang kapolisan sa Balamban ug Cebu City kabahin ning duha ka mga kaso sa mga nangamatay. (Lesley Caminade-Vestil ug Niña Sumacot, Ria Mae Booc/EIM) (BANAT BALITA)