Public bidding sa mga wa gamitang mga propiyedad sa siyudad di pa mahinayon

CEBU, Philippines - Ordinansa nga magtugot sa pagbaligya sa mga unredeemed real estate properties sa syudad pinaagi sa usa ka public bidding naaprubahan na apan kinahanglang amendahon tungod kay dunay mga kuwang nga probisyon ug kinahanglang aprubahan og balik sa mayor.

Si Konsehal Jose Daluz III, kinsa maoy amahan sa maong balaudnon nagkanayon nga anugon kaayo ang mga katigayonan sa dakbayan kung magpabilin kini nga walay pulos ug mapasagdaan lang nga madugta sama sa usa ka building nga naa nahimutang duol sa Capitol Site. Gibutyag usab niya nga walay ordinansa ang syudad nga moprotiher niining mga na-forfeit nga bahandi maong mas maayo nga mabaligya na lang kini kay makabenepisyo pa ang syudad.

Matud pa ni Daluz nga mas maayong mabaligya kini ngadto sa mga pribado nga sector aron makakwarta pinaagi sa real property tax nga ibayad unya sa mga makapalit ngadto sa gobiyerno ug makatabang sa kakuwang sa trabaho.

Base sa maong ordinansa ang presyo sa mga property nga ibaligya sa dakbayan magbase sa fair market value ug sa desisyon sa konseho.

Tan-awon usab kung angay ba nga ibaligya o gamiton alang sa mga housing projects sa dakbayan.  Human sa pag-aprobar sa maong ordinansa, moporma og usa ka special committee ang Sangguniang Panglungsod nga mao unya’y motutok sa mao nga balaod. (BANAT NEWS)