CEBU, Philippines - Upat ka pulis sa Dumanjug Police Station ang giingong mag-atubang og kasong administratiba human makaeskapo ang piniriso nga si Leomar Angana, 25, niadtong Abril 15.
Ang Provincial Investigation and Detective Management Branch (PIDMB) mirekomendar nga si SPO2 Florencio Clarion, jailer-on-duty, pasakaan og kasong grave misconduct human kini makalapas sa Rule 21C sa National Police Commission (NAPOLCOM) Memorandum Circular 2007-001. Si Clarion nakahimo og kalapasan sa Revised Penal Code o Special Laws.
Samtang, ang team leader nga si SPO1 Joel Sarmiento ug alert team nga sila si PO3 Ferdinand Imperial ug PO2 Ramon Chinel kasuhan usab og less neglect of duty human giingong nangatulog samtang nag-duty. Ang resulta sa maong imbestigasyon ipasa ngadto sa Police Regional Office (PRO)-7 alang sa pagpahigayon og summary hearing.
Si Angana nakaeskapo mga alas 2:00 sa kaadlawon pinaagi sa paguba sa kabilya sa kisame dayong agi sa kasilyas ug pagtangtang sa jalousie blades niini dayong sibat palayo.
Si Angana adunay kasong illegal nga paghupot og armas. Si Clarion mipahayag nga usa sa hinungdan sa pag-eskapo mao ang huyang nga pasilidad sa prisuhan. Apan matud sa PIDMB nga sala gihapon kini sa jail officer kay siya maoy gitahasan sa pagbantay niini kay iya man kining duty. Ang duty alert officers apil usab kay matud pa anaa sila sa maong opisina aron sa pagbantay.
Apil sa naaresto mao ang ig-agaw ni Angana nga si George Angana, 37; Jimmy de la Cerna, 19, ig-agaw nga si Bobby de la Cerna, 24; ug Roel Gutana, 22, taga Dumanjug nga naaresto sa Barangay Pawa. Nakuha gikan kanila mao ang duha ka KG9 nga pistol, duha ka magazines ug 20 ka bala, .45 nga pistol nga adunay magazine ug tulo ka bala, usa ka .357 nga revolver nga adunay upat ka bala, hand grenade ug duha ka kutsilyo. (BANAT NEWS)