CEBU, Philippines - Makadawat na og binuwan nga allowance ang mga opisyales ug trabahante sa mga barangay karong na-override sa konseho ang pag-veto ni Mayor Michael Rama sa ordinansahon kalabot niini.
Sa regular session kagahapon 13 ka mga konsehal sa dakbayan sa Sugbo ang mibotar pagsupak sa pagpugong ni Rama nga dili mapatuman ang maong ordinansahon nga binuwanon ang paghatag sa allowance sa mga nanarbaho sa barangay. Kini naglakip sa mga daycare teacher, mga barangay tanod, garbage collector, street sweeper, lupong tagapamayapa ug uban pa.
Samtang ang mipabor sa pag-veto ni Rama sa maong ordinansa sila ra si Konsehal Jose Daluz III, Edgar Labella ug Edu Rama.
Si Konsehal Margot Osmeña nagkanayon nga gusto na nila nga binuwanon ang paghatag sa mga allowance tungod kay mao kini ang gihangyo sa mga hingtungdan alang sa ilang inadlaw nga panggasto.
Samtang si Daluz miingon nga dili pa andam ang panudlanan sa siyudad alang sa binuwan nga allowance sa maong mga trabahante hinungdan nga di sila pabor sa maong sugyot.
Dugang pa ni Daluz nga andam sila sa pagsunod sa desisyon sa mayoridad nga membro sa konseho ug mapugos sila sa pagpatuman sa maong ordinansa .
Apan nagkanayon si Daluz nga ila pang paabuton ang mayor nga sa pagkakaron mibakasyon pa, aron kun magkinaunsa mahimong ilang ipasaka ang maong isyu ngadto sa korte aron kapugngan ang implementasyon niini. (BANAT NEWS)