Sikyu ug kahera gipaslak sa cr

CEBU, Philippines - Usa  ka wala  hiilhing  tulisan  misakiyo  sa halin  sa usa  ka tindahan  nga balor  og  P100 mil  uban sa sakyanan, human  ibalhug  sa pansayan  ang  kahera ug security  guard  niini sa  dalan  F. Cabahug, sa barangay Kasambagan, dakbayan  sa Sugbo  kagahapon  sa buntag.

Ang  nabiktima  sa maong  pagpanulis  mao  ang  ASSI Mart ug Yeson Travel Agency nga gipanag-iya ni Lee Won Chul,  usa  ka  Korean  national  nga nahimutang  sa maong  lugar. Nadala  sa  mga  tulisan  mao  ang  cash  nga dili mominus  sa P100 mil, laptop ug usa ka L3 Freezer Van. Ang kahera sa ASSI Mart nga si Liezel Baldicana, mibutyag  nga  usa  ka tawo  nga  nagpaka-aron  ingnong  kustomer  ang misulod  sa  tindahan   unya  mipalit  kini  og  noodles  sa cup   dayon  nangayo  og init  nga tubig  aron  iyang itimbol  niini.             

Dihang gihatagan  kini ni Baldicana   og  tubig  kalit kaayong gigunitan  ang  iyang  liog  uban  sa pag-ingon  nga tulis, dayon gimandoan  siya  pagsulod  sa pansayan  uban  sa iyang  mga  kauban  sa tindahan.           Gisaysay  ni  Baldicana nga  sayon kaayong  nakasulod  ang  tulisan tungod  kay  nakatug  ang  security guard  nga   si Elegio Buenaflor  ug gani human  kini  dis-armahe  sa  tulisan gisunod  kini  pagpaslak   sa pansayan.     

Samtang didto  sila  sa kasilyas gipanguha  sa tulisan  ang kuwarta  sa  kaha  nga di mokubos  sa P100 mil,  ug  usa  ka laptop, ug  sa paggawas  niini  gidagit  usab  ang sakyanan  nga  L3 Freezer van  nga may  plate  number  nga LMG-113. 

Si  PO1  Ador  Bacalso sa Mabolo Police  Station nagkanayon  nga  may posibilidad  nga  nagtrabaho  ra  sa maong  tindahan  ang  maong tulisan  tungod  sa kasuhito  niini  nga  gani  bisan  ang yawe  sa sakyanan  sayon kaayo  niining nakuha. (BANAT NEWS)