Supply sa illegal drugs mosaka—PDEA-7

CEBU, Philippines — Gibantayan sa Philippine Drug Enforcement Agency (PDEA)-7 ang posibleng pagsaka sa supply ug demand sa illegal nga drugas sa Central Visayas subay niining holiday season.

Matud ni Leia Alcantara, tigpamaba sa PDEA-7 nga basta holiday season daghan og kwarta ang mga tawo tungod kay tinghatag sa bonus.

Hinungdan nga gipanglantawan nila nga motaas ang demand sa illegal nga drugas tungod kay naa may kwarta nga ikapalit.  Dugang ni Alcantara kung motaas ang demand motaas usab ang supply.

 Kini maoy rason nga gihingusgan sa PDEA-7 ang ilang anti-illegal drug operation apil na ang koordinasyon sa ubang law enforcement units tungod kay naay ubang impormasyon nga dili maabot sa ilaha tua sa PNP.

Gi-monitor na PDEA-7 ang mga rota nga posibleng agian sa drugas nga ipasulod ug moagi sa Central Visayas.

Gipanglantawan sab sa PDEA-7 nga dili lang shabu ang mosaka sa demand apan apil na ang ubang klase sa drugas sama sa marijuana ug ecstasy.

Dinhi sa Central Visayas shabu ang pinaka ilado sanglit dali ra kining mapalit ug barato sab.

Sa bag-ohay lang nga operasyon, nadakpan sa mga operatiba sa City Intelligence Unit sa Cebu City Police Office(CCPO) ang usa ka high value individual  atol sa ilang buy-bust operasyon sa Sitio Railsite, Barangay Hipodromo, siyudad sa Sugbo, Miyerkules sa gabii, Nobiyembre 27, 2024.

Ang dinakpan mao si Nicko Dugho Maducol alyas Koboy, 18, nagpuyo sa maong lugar. Nasakmit gikan sa suspetsado ang 75 gramos nga shabu nga nagkantidad og P510,000.

Nakadawat og impormasyon ang kapulisan labot sa ilegal nga kalihukan sa suspetsado hinungdan nga ilaha kining gi-monitor ug gipahigayonan og buy-bust operation.  Kasong kalapasan sa Section 5 ug 11, Article II sa Republic Act 9165 ang ipasaka batok sa suspetsado. (BANAT NEWS)