Dalaga giluba sa wa ilhing tawo

CEBU, Philippines - Kritikal ang kahimtang sa usa ka babaye kinsa  gidunggab  sa wala  hiilhing  lalaki  didto  sa  Fine Tree Mall, barangay Poblacion, dakbayan sa Danao  sa miaging  kaadlawon.

Si SPO2 Ildefonzo Prosia  sa kapolisan sa maong  dakbayan miila sa biktima nga mao si Maria Teresa Lato, 28, dalaga nga nagpuyo sa sitio Daghol, barangay Guinsay sa maong dakbayan.

Matud pa ni SPO2 Prosia  nga gikan sa merkado publiko ang biktima   nga nag-inusarang naglakaw pauli sa ilang   balay dihang   kalit  kining  gidunggab  sa  wala hiilhing lalaki nga nagsunod   kaniya.

Tungod  kay  wala  makabantay  ang  biktima  gitaopan sa kutsilyo   ang  bukobuko  niini.

Sa  dihang  misinggit  kini  og  panabang,  mikaratel  dayon  og  dagan  ang  kriminal  pahilayo  sa maong  lugar  ug  gibiyaan  ang  biktima  nga  naligo  sa kaugalingon  niining  dugo.

Gihatud  dayon  sa  mga  nakasaksi  ang  biktima  ngadto   sa Danao District Hospital  apan  gibalhin  usab  dayon  kini  ngadto  sa   Vicente Sotto Memorial Medical Center (VSMMC) sa dakbayan sa Sugbo.

Si  SPO2 Prosia miingon   nga   padayon  pa  nilang  gipangita  karon ang  kriminal  kinsa  gituohan  nilang  igo  lang  namaregla  sa biktima. (Romeo T.  Limpangog/WC)

 Snatcher  nadakpan ug nasakmitan og marijuana

Usa ka snatcher  kinsa nasikop  sa kapolisan  human  manglabni  og  kuwentas  sa  kasakay  niyang pasahero  sa usa  ka  PUJ  didto  sa dalan  N. Bacalso  sa barangay  Sambag 1 ning  dakbayan  sa Sugbo  sa miaging  buntag nasakmitan  usab  og usa  ka linikit nga  marijuana sa mga  otoridad.

Ang suspek giila si Michael Acebo, 18, molupyo sa San Carlos Height Brgy.   Quiot ning dakbayan sa Sugbo, kinsa  ilado  kaayo  sa pagka-kawatan.

Si PO3 Mark Eric Sy,  nga  maoy   arresting officer mibutyag  sa  Banat News  nga ang suspek luwan sa usa ka jeep pasaheroan   dihang   gilabni  niini  ang   kuwentas sa usa ka senior citizen  nga  babaye  nga iyang kasakay.

Tungod  kay  misinggit  ang  tiguwang  og  panabang, namatikdan  kini  sa mga  polis  sa   Fuente Police Station nga  nagpahigayon og mobile patrol sa maong dapit.

Daling nakarespondi ang  maong  mga  polis ug diha-diha nadakpan dayon  ang  suspetsado ug  dihang  girekisa,  didto  sa bulsa  sa  suspek  ang  kuwentas  sa tiguwang  ug  ang  usa  ka  linikit  nga  marijuana.

Dugang ni Sy nga gawas  nga  notadong  kawatan,  ilado  pa  gyud  nga  tiggamitan  og  gidiling  drugas  ang  suspetsado.   

Sa  pagkakaron  gitanggong  na  sulod  sa prisohan  sa  Fuente Police Station si Acebo kinsa  gitakdang pasakaan og kaso gumikan  sa kalapasan sa Section 11 Article 2 sa R.A 9165.  (BANAT NEWS)