CEBU, Philippines - Patay ang usa ka lalaki nga gisaka sa sulod sa kusina sa ilang panimalay human kalit gisud sa mga armadong lalaki ug mipaulan kaniya og bala sa miaging gabii diha sa sitio Saac, Zone 6, barangay Buaya, dakbayan sa Lapulapu.
Ang biktima mao si Jovanni Matudio Gaba, 31, nagpuyo sa maong dapit ug ang nagpusil mao ang tulo ka wala hiilhing lalaki nga nagsakay og motorsiklo.
Si PO2 Winston Ybañez sa Homicide Section sa kapolisan sa maong dakbayan nga nahinabi sa Banat News miingon nga naglimpyo og isda ang biktima nianang tungora dihang kalit nga nanulod ang mga mamumuno ug mipusil sa biktima sa ulo ug lawas.
Sumala pa nga nasugatan pa sa inahan sa biktima ang mga mamumuno sa dayon nilang ikyas apan gimandoan siya nga pahapaon kay wa kini labot sa atraso sa anak.
Base sa gitug-an sa inahan ngadto sa mga imbestigador giingong dunay kalambigitan sa pagpamaligya og illegal nga drugas ang motibo sa pagpatay tungod kay gidudahang wala mo-remit sa halin sa illegal nga drugas ang anak. (BANAT NEWS)