CEBU, Philippines - Nagsangkiig sa kasakit sa tuhod ang duha ka babayeng pasahero sa sakyanan human kini pamusila sa usa ka lalaki samtang nagdagan ang trak nga ilang gisakyan didto sa highway sa barangay Cogon East, Lungsod sa Carmen sa miaging hapon.
Ang mga biktima mao sila si Rosario Cabague, 34, ug Lucena Crisostomo, 51, pulos taga lungsod sa San Remegio, samtang ang suspetsado giila nga si Ranilo Muana, hingkod, nga taga Carmen. Si SPO2 Simplicio Gibo mibutyag sa Banat News nga nagsakay ang mga biktima sa Cebu Autobus paingon sa Daan Bantayan gikan sa dakbayan sa Sugbo dihang pag-abot nila sa Cogon East, ang suspetsado nga naglingkod daplin sa karsada mipabuto sa iyang pusil tumong sa maong sakyanan.
Hinuon sa kapin sa napulo ka pasahero sila ra si Cabague ug Crisostomo maoy naigo sa bala.
Ang suspetsado nga positibong giila sa mga biktima gidakop dayon sa kapolisan ug gibalhug sa prisohan samtang gipasaka na ang kaso batok kaniya samtang ang mga biktima gihatud dayon ngadto sa Vicente Sotto Memorial Medical Center sa dakbayan sa Sugbo. (/WC) (BANAT NEWS)