CEBU, Philippines - Gidasig ni konsehal Edgar Labella sa dakbayan sa Sugbo ang Dagang Foundation Inc. (DFI) sa tinguha niini nga pagpalambo sa lumadnong pinulongan nga Sinugboanon sanglit usa kini mga bililhong kabilin sa mga katigulangan.
Matud pa ni Labella atol sa anibersaryo sa DFI didto sa Sacred Heart Center sa miaging adlaw nga giplano na usab niya nga ang Binisaya nga pinulongan mao nay gamiton sa konseho sa ilang mga sesyon ug sa mga public hearing.
Iyang gipasabot nga ang paggamit sa maong pinulongan makatabang kaayo sa ubang tawo nga makapahayag sa ilang hunahuna ug makatampo og ideya sa gusto nilang itimang sa mga isyu nga may labot sa serbisyo publiko.
Samtang alang kang Mayor Adelino Sitoy sa lungsod sa Cordova, kinsa usa sa mga opisyal sa DFI nga a ng pagpalambo sa Binisaya nga pinulongan maoy katumanan sa mga mithi ug damgo sa maong kapunongan.
Si Sitoy kinsa nahimong haligi sa Lubasnong Dagang Bisaya (LUDABI) ug Akademyang Bisaya nagkanayon nga ang pagpabaya sa kaugalingon natong pinulongan naghimo sa mga batan-on karon nga makaluluoy bahin sa paggamit niining lumadnong pinulongan.
Ang DFI maoy hugpong sa mga magsusulat sa pinulongang Sinugboanon nga nahimong hanas gumikan sa makanunayon nga paggamit niini.
Apan matud pa ni Sitoy nga gumikan kay wala na kaayo kini itudlo sa mga eskuylahan, ang mga kabataan karon ingon og sa gihikawan sa tukmang edukasyon bahin sa paggamit pinaagi sa pagpamulong ug pagsulat ning maong pinulongan.
Midugang siya nga ang kakuwang sa kadasig sa mga Sugboanon sa pagsagop sa pinulongang Binisaya maoy nakaingon nga sagad sa mga batan-on bakikaw kaayo manulti ug mosulat og Binisaya nga linguwahe.
Unya ang nakapait matud pa ni Sitoy nga kun maglisud sa pagsulti ug pagsuwat sa pinulongang Binisaya, labaw pang maglisud sa pagsulti ug pagsuwat og pinulongang English.
Midugang si Sitoy nga ang pagbaid sa mga batan-on aron mahimong hanas sa paggamit sa Binisaya sa pagpamulong ug pagsuwat, magsilbi usab nga giya kanila paggamit sa pinulongang Inenglis. (BANAT NEWS)